Astanada esigin ashyp júrgen avtobýs júrgizýshisi jumysynan qýyldy
ASTANA. QazAqparat - Astanada qoǵamdyq kólik júrgizýshisi ereje buzǵany úshin jumysynan qýyldy, dep habarlaıdy QazAqparat tilshisi.
Facebook paıdalanýshysy Býlat Kamıtov elordada jolaýshy toly avtobýsty júrgizýshiniń esigin jappaı júrgizgeni jaıly jazbasyn jarııalady.
Elorda turǵyny shaǵyn áńgime ispetti jazbasynda tańerteńgi qaýyrt shaqta jolaýshyǵa tolǵany sonshalyq, ıne shanshar oryn qalmaǵan avtobýstyń esigi jabylmaǵan soń, júrgizýshiniń oılap tapqan «aılakerligin» bylaı sýretteıdi: «Kóliktiń esikteri jabylmaǵan soń, júrgizýshi adamdardyń bárin syıǵyzýdyń keremet tásilin oılap tapty. Esikteri ashyq avtobýs kúrt jyldamdyǵyn arttyryp, kenet toqtap, birese júrip, birese tejelip, jolaýshylardy osylaı tabıǵı teńseltý arqyly nyǵyzdaı bastady».
«Astana LRT» oqys oqıǵaǵa jyldam shara qoldandy.
«Júrgizýshi Agımov D.O. jumysynan qýyldy, ony baǵdardan alyp tastadyq. 2018 jylǵy 15 naýryzǵa ádep keńesi belgilendi. Mán-jaıdy tekserip bolǵan soń, nátıjesi jaıly osy postyń astynda habarlaımyz», - dep málimdedi uıymnyń baspasóz qyzmeti.
