Astanada Erjan Babaqumarovtyń ólimine qatysty is boıynsha sot úkimi shyqty
ASTANA. KAZINFORM — Astanada Almaty qalasy ákiminiń burynǵy orynbasary Erjan Babaqumarovty óltirý isi boıynsha sot úkimi kesildi.
Astana qalasynyń qylmystyq ister jónindegi mamandandyrylǵan aýdanaralyq soty aıyptalýshyny kináli dep tanydy. Sot úkimine sáıkes, oǵan 11 jyl merzimge bas bostandyǵynan aıyrý jazasy taǵaıyndaldy. Bul týraly Astana qalalyq sotynyń baspasóz qyzmeti habarlady.
Úkim 2026 jylǵy 20 aqpanda shyǵarylyp, zańdy kúshine engen. Negizgi sot talqylaýy jabyq rejımde ótkendikten, is boıynsha qosymsha málimetter jarııalanbaıdy.
Eske sala ketsek, qaıǵyly oqıǵa 2025 jylǵy 30 qazanǵa qaraǵan túni bolǵan. Sol túni Erjan Babaqumarov tanystarynyń ortasynda bolǵan. Tanystar arasynda kıkiljiń týyp, arty tóbeleske ulasqan. Sol kezde jaraqat alǵan eks-sheneýnik mert bolǵan. Onyń mezgilsiz qazasy qoǵamda úlken rezonans týdyrdy.
Marqum Erjan Babaqumarov 2022 jylǵa deıin birqatar memlekettik jáne jaýapty qyzmet atqardy. Ol Qazaqstan damý ınstıtýtynyń Saıası zertteýler ortalyǵynda, Almaty qalasy ákiminiń apparatynda, QR Prezıdenti Ákimshiliginde, QR Mádenıet jáne aqparat mınıstrliginde, QR Premer-Mınıstriniń Keńsesinde, sondaı-aq QR Prezıdenti janyndaǵy Ortalyq kommýnıkatsııalar qyzmetinde eńbek etti.
Sonymen qatar 2019 jylǵy sáýir–shilde aralyǵynda QR Prezıdentiniń keńesshisi boldy. Al 2019 jylǵy shildeden 2022 jylǵy aqpanǵa deıin Almaty qalasy ákiminiń orynbasary qyzmetin atqardy. Keıin 2022 jyly QR Prezıdenti janyndaǵy «Ortalyq kommýnıkatsııalar qyzmeti» RMM dırektory boldy.
