Astanada erteńnen bastap ortalyq kóshelerdiń biri 5 aıǵa jabylady
ASTANA. KAZINFORM – LRT qurylys jumystaryn júrgizý josparyna sáıkes ortalyq kóshelerdiń biri 5 aıǵa jabylady. Bul týraly Astana qalasy ákimdiginiń baspasóz qyzmeti habarlady.
— 20 sáýir saǵat 21.00-den 25 qyrkúıekke deıin 113 stantsııada Mınıstrlikter úıinen jerústi jaıaý júrginshiler ótkeliniń qurylysyna baılanysty, Syǵanaq kóshesinen Máńgilik El dańǵylyna (Dostyq kóshesi baǵytynda) qaraı, Arys kópirinen qozǵalatyn kólik úshin oń jaqty sezdegi qozǵalysty tolyq shekteý josparlanyp otyr.
— 22 sáýir saǵat 22:00–den bastap 20 qyrkúıekke deıin Qabanbaı batyr dańǵylynyń «Astana Juldyzy» stelasy jaǵynan Hýseın ben Talal kóshesimen qıylysyna jetpeı 106-stantsııa qasbetiniń qurylys jumystaryn oryndaý úshin, avtojoldy úsh jolaqtan bir jolaqqa deıin taryltý jolymen shekteý engiziledi.
— Elorda qonaqtary men turǵyndarynan qozǵalys baǵytyn aldyn ala josparlaýdy suraımyz, sondaı-aq ýaqytsha qolaısyzdyq úshin keshirim suraımyz, - delingen habarlamada.
Aıta ketelik Astanada Gaýhartas kóshesiniń bir bóligi ýaqytsha jabylatyny týraly jazǵan edik.