Astanada ertegi keıipkerleri balalarǵa jol qaýipsizdigi erejesin úıretip júr

Astana qalalyq qýyrshaqtar teatrynyń dırektory Toǵjan Hasanǵalıevanyń aıtýynsha, aktsııany qýyrshaqtar teatrynyń ujymy kólik polıtsııasy, bilim jáne mádenıet basqarmalarymen birlesip ótkizip jatyr. Aktsııa joldaǵy qala turǵyndarynyń, onyń ishinde balalar qaýipsizdigin qamtamasyz etý jáne qoǵam nazaryn ózekti máselege aýdarý maqsatyn kózdeıdi. Atalmysh shara qalanyń Respýblıka jáne Seıfýllın kóshelerinde jáne Abaı dańǵylynda ótip jatyr.

Astanalyq Jastar saraıynyń aldynda balalardy jolda júrý mádenıetine baýlý úshin «Ǵajaıyptar álemindegi Alısa 2» spektakliniń qoıylymy ata-analar men balalar nazaryna usynylýda. Shara barysynda ertegi keıipkerleri búldirshinderge jol qaýipsizdigi erejelerin túsindirip, balalardy qaýipsiz túrde joldan ótkizdi.

Teatr dırektory mekemeniń bundaı sharalardy aıyna eki ret dástúrli túrde ótkizip turýdy josparlap otyrǵandyǵyn aıtty. «Osyndaı qoǵamdyq mańyzy zor sharany oqý jylynyń basynda jáne oqý jylynyń sońynda ótkizýdi jón kórip otyrmyz. Men bul aktsııany «Óz ómirińdi saqta» dep beınelep aıtar edim, sebebi jol qaýipsizdigi máselesi búgingi kúni óte ózekti bolyp otyr. Sońǵy jyldyń ózinde 2,5 myń jol -kólik apaty oryn alǵan. Olardyń arasynda balalardyń qatysýymen bolǵan apattar óte kóp», - dedi Toǵjan Hasanǵalıeva óz sózinde.