Astanada erli-zaıyptylar jańa týǵan sábıin kólikke aıyrbastamaq bolǵan
ASTANA. QazAqparat - Ózbekstannan kóship kelgen, Qazaqstanda alty jyl qatarynan turǵan eki balaly otbasy kóp qınalmastan bir mezette baıýdy oıǵa alady. Sóıtip, áıel óziniń júkti ekenin bilgen kezde ǵalamtordaǵy saıtta áli dúnıege kelmegen balasyn 2004-2008 jyldary shyqqan avtokólikke aıyrbastaıtyny týraly habarlandyrý qaldyrady, dep habarlaıdy Astana qalasynyń prokýratýrasynan.
Bul habarlandyrýdy kórip jany túrshikken A. esimdi azamatsha balany taýar retinde satqysy keletin áıeldiń adamgershilikke jatpaıtyn áreketi jaıly polıtsııa organdaryna habarlaıdy. Keıin azamatsha A. polıtsııa qyzmetkerimen birge erip baryp, erli-zaıypty sekildi joǵarydaǵy jandarmen balany satyp alý týraly kelissózder júrgizedi. Balasyn satpaq bolǵan erli-zaıyptylar sábıdiń ornyna «Toyota Camri» kóligin surap, qolma-qol aqsha alýdan úzildi-kesildi bas tartady.
2015 jylǵy 27 qańtarda atalǵan áıel ul bala bosanyp, eki kúnnen keıin perınataldyq ortalyqtan shyǵady jáne sol kúni A.esimdi azamatshaǵa qońyraý shalyp, balany alyp ketýin suraıdy. Kezdesýge týylǵanyna endi ǵana eki kún tolǵan náresteniń ata-anasy keledi. Olar materıaldyq paıda tabý maqsatynda balany qujattarymen A.-ǵa tabystap, onyń ornyna senimhat boıynsha náresteniń ákesiniń atyna jazylǵan avtokólikti alady jáne balaǵa qatysty esh narazylyqtary joqtyǵy týraly qolhat jazyp beredi. Astana qalasynyń kámeletke tolmaǵandar isteri jónindegi mamandandyrylǵan aýdanaralyq sotynyń 2015 jylǵy 22 sáýirdegi úkimimen atalǵan azamattar QR Qylmystyq Kodeksiniń 135-baby 2-bóliginiń 1,10-tarmaqshalary boıynsha kámeletke tolmaǵan adamdy satý, ıaǵnı satý-satyp alý nemese jábirlenýshiniń materıaldyq nemese ózge de táýeldiligin paıdalana otyryp adamdar tobynyń aldyn ala sóz baılasýymen kámeletke tolmaǵan adamǵa qatysty mámile jasaýda kináli dep tanyldy. Sóıtip, olar múlki tárkilenip, árqaısysy jalpy rejimdegi túzeý kolonııasynda jazasyn óteýmen 7 jylǵa bas bostandyǵynan aıyryldy. Sottyń úkimi óz kúshine endi.
