Astanada erekshe júıemen jumys isteıtin baǵdarshamdar ornatylady
ASTANA. QazAqparat - Osyǵan deıin synaqtan ótken erekshe baǵdarshamdar endi qala boıynsha birneshe aýdanda ornatylady. Bul týraly Astana qalasynyń jolaýshylar kóligi jáne jol-kólik ınfraqurylymy basqarmasynyń jetekshisi Ashat Qaraǵoıshın aıtty, dep habarlaıdy QazAqparat tilshisi.
«Qala ákiminiń tapsyrmasy boıynsha osydan eki aı buryn, kóshelerge eki jańa baǵdarsham ornatylǵan bolatyn. Olar búginde synaqtan ótti. Endi qala boıynsha odan ári ornatýdy josparlaýdamyz. Biz úshin baǵdarshamdardyń basty mańyzy qaýipsizdikti qamtamasyz etýi. Atalǵan baǵdarshamnyń ereksheligi kúndiz de, túnde de alystan kórinetin jaryq dıodtary janyp turady, ony baıqamaý múmkin emes. Eń basty nátıje jol-kólik oqıǵalary azaıdy, jaıaý júrginshiler de erkin júrip-turady», - dedi Ashat Qaraǵoıshın.
Onyń aıtýynsha, qala boıynsha jol-kólik oqıǵasy jıi bolatyn qaýipti aımaqtarǵa taǵy da 11 baǵdarsham ornatý josparlanýda.
Sonymen qatar basqarma basshysy Respýblıka dańǵylyna ornatylǵan erekshe baǵdarshamdy synaqtan ótkizý kezinde ol jerde birde bir jol-kólik erejesin buzý oqıǵasynyń bolmaǵanyn aıtty. Jáne de erekshe baǵdarshamnyń kádimgi baǵdarshamnan qymbatyraq bolǵanymen óte tıimdi ekenin de tilge tıek etti.
Aıta keteıik, burynyraq Respýblıka dańǵylynda pılottyq joba retinde tirek arqyly vızýaldy jaryq beretin baǵdarsham ornatylǵany týraly aıtylǵan bolatyn. Atalǵan baǵdarshamdar Máskeý, Kıev, Dýbaı sekildi álemniń basqa da iri qalalarynda qoldanylady.
