Astanada «erekshe» Jaıdarman oıyndary ótedi
Bul týraly Qazaqstan KVN odaǵynyń prezıdenti Esen Eleýken habarlady.
«Túrkitiles elder arasynda «Jaıdarman» oıyny ótedi. Saıys qazaq tilinde bolady. Mundaı mazmunda tuńǵysh ret uıymdastyrylatyn «Jaıdarman» saıysyna tatar, bashqurt, qarashaı, noǵaı, ózbek, qaraqalpaq, qyrǵyz taǵy sol sekildi 14 ulttyń komandalaryn shaqyryp otyrmyz. Mońǵolııadan da aǵaıyndar shaqyryldy. Shaqyrylǵan 14 ult komandalarynyń ony kelse de úlken jańalyq bolaıyn dep tur», - deıdi Qazaqstan KVN odaǵynyń prezıdenti.
Esen Eleýkenniń aıtýynsha, sońǵy 2 jylda Qazaqstan KVN-shileri atalǵan elderge baryp, sol eldiń tilderinde oınaǵan. Basynda kópshilik senbegenimen, Qazaqstan ónerpazdary osy qadam arqyly túrkitildes elder bir-biriniń tilinde «Jaıdarman» oıyndaryn ótkizýge bolatynyn dáleldegen. Sol elge barǵan kóńildi, ári tapqyr jastar kóptegen sózderdiń ortaqtyǵyna tań qalyp júrgen kórinedi.
«Basynda eshkim sengen joq. Qazir kózderi ashyldy. Olardyń bizdiń el týraly oıy múlde basqa. Túrli forýmdardyń mańyzy zor, biraq «Jaıdarman» syndy sharalar arqyly jastardyń bir-birimen baılanysy jyldam qalyptasar degen senimimiz bar. Qazaq KVN-shileri úshin ózge tilde oınaý qıyndyq týǵyzǵan joq. Mysaly, bizdiń tilimiz noǵaılarmen birdeı dese de bolady. Ár topqa bir adamnan bólip, til jaǵynan kómektesemiz. Eń bastysy jastardyń qyzyǵýshylyǵyn oıatyp jibersek deımiz», - deıdi E.Eleýken.
