Astanada «erekshe kvartal» salý qajet - sheteldik sáýletshiler
ASTANA. QazAqparat - Astanada ótken Halyqaralyq sáýletshiler kongresinde sheteldik sarapshylar elorda qurylysyna qatysty ózderiniń usynystaryn aıtty, dep habarlaıdy QazAqparat tilshisi.
«Astanada sheteldik sáýletshiler jobalaǵan ǵımarattarda avtorlardyń qazaqstandyq mádenıetpen baılanys izdegenin kórýge bolady. Sondaı ǵımarattardyń biri dala gúlin eske túsiredi. Odan bólek, jergilikti sáýletshilermen seriktestiktiń ornatylýy mańyzdy», - dedi QR Mádenıet jáne sport mınıstrliginde ótken baspasóz máslıhatynda BUU sarapshy-sáýletshisi Istelıanna Atanasova.
Ol Qazaqstan astanasynyń turǵyndardyń qalaýy boıynsha damıtynyn atap ótti.
«Bul oraıda, álem qalalarynyń aldynda turǵan syn-qaterler jóninde aıtqym keledi: Astana úshin óz turǵyndarymen jáne jergilikti bılikpen tyǵyz qarym-qatynasta bolý mańyzdy der edim. Sebebi, qalalar turǵyndardyń qalaýymen turǵyzylýy tıis. Astana - ǵajaıyp qala, eger adamdarǵa yńǵaıly bolyp damı tússe, odan da ǵajap qalaǵa aınalady», - deıdi I. Atanasova.
Óz kezeginde ulybrıtanııalyq sáýletshi Krıstıan Meıl Astananyń ózine ǵana tán erekshe kvartal salynýy qajet degen usynys bildirdi.
«Astanada qyzyqty nysandar jetkilikti, óz saparymyzda qalanyń qalaı josparlanǵanyn tamashaladyq. Men Astananyń ózine ǵana tán shaǵynaýdan salýdy usynar edim. Bul aýdan qazirgi Astanadaǵy nysandardy biriktirýi tıis», - dedi sáýletshi.
Mysal retinde Krıstıan Meıl Eýropa elderin atap ótti.
«Álemniń kóptegen qalalary ózine tán kvartaldarmen tanymal - Londonda grýzın kvartaly bolsa, Parıjde tanymal jelekjol bar. Astananyń da ózine ǵana tán bir nysany bolýy kerek», - dep usynys bildirdi K. Meıl.
Aıta keteıik, halyqaralyq sáýletshiler kongresi 16 shilde kúni Astanada ótti. Oǵan Taıaý jáne Qıyr Shyǵys sáýletshileri, Qazaqstan óńirleriniń sáýletshileri jáne kásipkerler qatysty.
