Astanada erekshe kútimdi qajet etetin balalardy qoldaýǵa arnalǵan bal ótedi
Aıryqsha kútim qajet balalardyń bilim alýy jáne talantty jastardy qoldaý máselelerine qoǵamnyń nazaryn aýdarý maqsatynda «Bolashaq» qory jyl saıynǵy qaıyrymdylyq balyn ótkizedi.
Osymen 11-ret ótetin qaıyrymdylyq sharasynan buǵan deıin 218 mln teńge kóleminde qarajat jınalyp, ol qarjyǵa balalar úıi men alańdar, 8 mamandandyrylǵan ońaltý mekemeleri, elimizdiń 9 qalasyndaǵy 20 mektepte ınklıýzıvti bilim berý synyptary ashyldy. Sondaı-aq, 600-den astam bilim berý men túzetý mekemeleriniń mamandary oqytyldy. Odan bólek, az qamtylǵan otbasydan shyqqan balalar men erekshe qajettiligi bar balalarǵa 17 oqý ornyna 50-ge jýyq grant berildi.
«Elimizde búginniń ózinde aýtızmmen syrqattanatyn 35 myń bala bar. Bizdiń maqsatymyz jaı ǵana ádemi kesh ótkizý emes, solarǵa qol ushyn sozý, olardyń teń quqyly ómir súrýine jaǵdaı jasaý. Atalǵan sharany ótkizýge atsalysyp, kómegin usynyp jatqan qaıyrymdy jandar jeterlik. Onyń ishinde memlekettik organdar, «Nur Otan» partııasy, tipti qarapaıym azamattar da bar. Qaıyrymdylyq balynan túsken qarajat túgeldeı balalarǵa jumsalady», - dedi «Bolashaq» qorynyń dırektory Dınara Chaıjýnýsova baldy uıymdastyrýǵa oraı ótken baspasóz máslıhatynda.
Onyń sózine qaraǵanda atalǵan qor 2019 jyly elimizdiń barlyq óńirlerinde ınklıýzıvti bilimdi qoldaý kabınetin ashýdy josparlap otyr.
Sonymen qatar, bal aıasynda aýktsıon ótkizilip, oǵan túrli baǵaly zattar qoıylady dep kútilýde. Atap aıtsaq, baspasóz máslıhatyna qatysqan tanymal sportshy Ilıa Ilın óziniń osydan 3 jyl buryn Groznyıda ótken Reseı prezıdenti kýbogynda rekord ornatqan kezdegi kıgen fýtbolkasyn qoltańbasymen tapsyrdy.
Qaıyrymdylyq bal 8 jeltoqsan kúni Astanadaǵy Radisson Hotel Astana qonaqúıinde ótedi, oǵan qatysýshy 40 myń teńge jarna tóleýi tıis. Onyń ishine keshki as pen kontserttik baǵdarlama jáne utys oıynyna qatysý kiredi. Kesh qonaǵy belgili ánshiler - Moldanazar jáne Nurjamal Úsenbaeva.