Astanada erekshe dızaındaǵy taǵy eki aıaldama salynady
ASTANA. QazAqparat - Astanada jyl sońyna deıin erekshe dızaındaǵy taǵy eki aıaldama salynady, dep habarlaıdy QazAqparat qala ákimdiginiń resmı saıtyna silteme jasap.
Atap ótilgendeı, Saryarqa aýdanynyń ákimdigi erekshe avtobýs aıaldamalarynyń jańa jobasyn ázirledi. 2018 jyldyń sońyna deıin elorda turǵyndary men qonaqtaryn erekshe formadaǵy taǵy eki aıaldama qýantatyn bolady. Máselen, «Teatr» aıaldamasy sahna fragmentterine uqsas jasalady. Ol «Jastar» teatrynyń aýmaǵyna qoıylady. Al Jeńis dańǵylynda «Mýzyka» pavılony ornalasady. Eki joba da qazir daıyndyq kezeńinde.
«Mundaı kreatıvti aıaldamalar qoǵamdyq kólikti kútip turǵan ýaqytyńyzdy ádemi ótkizýge, kóńil-kúıińizdi kóterip, eriksiz jymııýyńyzǵa áserin tıgizedi» - deıdi Saryarqa aýdany ákimdigi.
Aıaldamalardy turǵyzý úshin qoldanylatyn materıaldar Astananyń klımattyq jaǵdaıyna laıyqtalǵan.
Esterińizge sala keteıik, búginde Saryarqa aýdanynda 3 erekshe aıaldama ornatylǵan. Onyń biri -shapkasy bar pavılon. Ol Saryarqa dańǵylyndaǵy «Zerde» aıaldamasynda ornalasqan. Al ekinshisi Respýblıka dańǵylynda tur. Ol latyn árpimen jazylǵan BUS túrinde salynǵan pavılon. Al birer kún buryn turǵyndardy sporttyq aıaldama tań tamasha qaldyrǵan bolatyn. Ol Qajymuqan Muńaıtpasov stadıonyna qatar ornalasqan.
