Astanada erekshe bilimdi qajet etetin balalar spartakıadasy bastaldy
ASTANA. QazAqparat - Osymen ekinshi jyl uıymdastyrylyp jatqan bilim alýda erekshe muqtajdyǵy bar balalarǵa arnalǵan «Juldyzaı» respýblıkalyq spartakıadasy saltanatty túrde ashyldy, dep habarlaıdy QazAqparat tilshisi.
Buǵan deıin Qazaqstannyń 16 qalasynda irikteý kezeńderi ótip, olarda 3 myńnan astam jas sportshy baq synady. Spartakıadanyń aqtyq synyna elimizdiń barlyq óńirinen 411 bala súrinbeı ótti.
Úsh kúnge sozylatyn sport jarysy mını-fýtbol, golbol, jeńil atletıka, júzý ústel tennısi sııaqty sport túrlerimen qatar asyq atý, bestas syndy ulttyq oıyndardan da synǵa túsedi.
«Búgingi spartakıadany batyldyq pen tózimdiliktiń, qajyrlyq pen qaırattylyqtyń saltanaty dep aıtsaq artyq emes. Memleket damýyndaǵy mańyzdy isterdiń biri ol erekshe kútimdi talap etetin jandarǵa mán berý, jaǵdaı jasaý. Qazirde olardyń quqyqtaryn qorǵaýmen qatar, qoǵamdyq sharalarǵa kóptep qatystyrý jumystary júrgizilýde. Sonymen qatar elimizde ınklıýzıvti bilim berý júıesi qolǵa alynýda, odan bólek erekshe kútimdi talap etetin azamattardy eńbekpen qamtý aıasynda da birqatar jumystar atqaryldy. Bul óz kezeginde Elbasynyń tikeleı tapsyrmasy bolyp tabylady. Búgingi spartakıadada Sizderdiń barlyqtaryńyz jeńimpazsyzdar» - dedi «Nur Otan» partııasy tóraǵasynyń birinshi orynbasary Máýlen Áshimbaev.
Saıys qatysýshylarynyń eń jarqyn sátteriniń biri retinde belgili telejúrgizýshi, qoǵam belsendisi Arýjan Saınnyń jetekshiligimen ótken jattyǵý bolǵanyn aıtyp ótken jón.
Sonymen qatar spartakıada aıasynda elimizdiń túkpir túkpirinen kelgen sportshy balalarǵa Elordanyń tarıhı-mádenı jáne kórikti jerlerin kórsetý sharasy uıymdastyrylady.
Aıta keteıik, «Juldyzaı» erekshe bilimdi qajet etetin balalardyń respýblıkalyq spartakıadasy «Nur Otan» partııasy, «BI-Juldyzaı» korporatıvtik qory, QR Bilim jáne ǵylym mınıstrligi, Nazarbaev ýnıversıteti jáne Almaty, Astana qalalary men oblystar ákimdikteriniń qoldaýymen ótýde.
