Astanada erekshe balalarǵa ulttyq qolóner úıretilip jatyr
ASTANA. KAZINFORM – Astanada balalar men jastarǵa arnalǵan «Ulttyq qolóner mektebi» jobasy ótip jatyr. Úsh aptalyq baǵdarlamaǵa 450-den astam ótinimniń ishinen 208 qatysýshy iriktelgen.
Olarǵa ulttyq qolónerdiń 10 baǵyty boıynsha tegin bilim berilip jatyr. Arasynda erekshe bilim berý qajettilikteri bar balalarǵa arnalǵan ınklıýzıvti top ta bar.
Jobany Qazaqstan Respýblıkasy Mádenıet jáne aqparat mınıstrliginiń qoldaýymen «Kreatıvti ındýstrııalardy damytý qory» korporatıvtik qory uıymdastyrǵan.
Sabaqtar 27 shilde men 12 tamyz aralyǵynda Astanadaǵy Qazaq Creative Hub alańynda júrip jatyr. Baǵdarlamaǵa zergerlik óner, kıiz basý, qysh jáne keramıka, súıek oıý, kilem toqý, teri jáne aǵash óńdeý sııaqty dástúrli qolóner túrleri engizilgen.
Joba aıasynda erekshe bilim berý qajettilikteri bar balalarǵa beıimdelgen qysh óneri de oqytylady. Arnaıy toptaǵy qatysýshylar sazben jumys istep, ony ılep, pishinge keltirý arqyly túrli buıymdar jasaıdy.
Qysh sheberi Tólegen Namazbekovtiń aıtýynsha, bul sabaqtarda balanyń daıyn úlgini qaıtalaýynan buryn, materıalmen óz betinshe jumys isteýine múmkindik berý mańyzdy.
– Qyshpen jumys istegende bala materıalmen tikeleı baılanysta bolady. Sazdy qolymen ustap, ılep, óz oıyndaǵy dúnıege pishin beredi. Bul jerde bala óz qııalyna erkindik alady, – deıdi sheber.
Erekshe bilim berý qajettilikteri bar balalarmen jumys kezinde olardyń qabyldaýy men jumys qarqynyn eskerý qajet. Sondyqtan sabaqta balalardy asyqtyrmaı, materıalmen tanysyp, óz betimen baıqap kórýine jaǵdaı jasalady.
Sheberdiń pikirinshe, sazben jumys isteý usaq motorıkany damytýǵa, zeıindi bir iske shoǵyrlandyrýǵa jáne bastaǵan jumysty sońyna deıin jetkizýge kómektesedi. Sonymen qatar qysh buıymynyń daıyndalý protsesi balany shydamdylyqqa úıretedi. Sazdan jasalǵan buıym aldymen keptirilip, keıin arnaıy peshte kúıdiriledi, sodan soń ǵana daıyn kúıge keledi.
– Basty nátıje daıyn buıymnyń ózi emes. Bala bir nárseni óz qolymen jasap kórdi, úırendi, qatelesti, qaıta jasap kórdi. Eń mańyzdysy – óz múmkindigine sendi. Keıde balaǵa «sen jasap kór» dep múmkindik berý jetkilikti, – deıdi Tólegen Namazbekov.
Joba uıymdastyrýshylary da ınklıýzıvti baǵyttyń negizgi maqsaty balalarǵa ulttyq mádenıetke qatysýǵa jáne shyǵarmashylyq qabiletin kórsetýge múmkindik berý ekenin atap ótti.
– Inklıýzııany biz tek arnaıy jaǵdaı jasaý dep qabyldamaımyz. Eń bastysy – balanyń shyǵarmashylyq úderiske qatysýyna, ózine unaıtyn dúnıeni baıqap kórýine jáne eńbeginiń nátıjesin kórýine múmkindik berý, – dedi «Kreatıvti ındýstrııalardy damytý qory» korporatıvtik qorynyń baspasóz qyzmeti.
Jobaǵa elimizdiń ár óńirinen 331 qolóner sheberi ótinim bergen. Respýblıkalyq irikteý nátıjesinde olardyń arasynan 10 sheber tańdaldy. Olar qatysýshylarǵa qolónerdiń dástúrli tehnologııalaryn úıretip, praktıkalyq sabaqtar ótip jatyr.
Úsh apta ishinde ár qatysýshy tańdaǵan baǵyty boıynsha óz qolymen avtorlyq buıym ázirleıdi. Oqý barysynda qajetti materıaldar men qural-jabdyqtar tegin beriledi.
12 tamyzda «Ulttyq qolóner mektebiniń» qorytyndy kórmesi ótedi. Onda qatysýshylardyń oqý barysynda jasaǵan jumystary kópshilik nazaryna usynylyp, mektep túlekterine sertıfıkattar tabystalady.
Aıta keteıik, buǵan deıin, elimizde 650-den astam qolónershiniń bastamasyna qoldaý kórsetilip keletinin jazǵan edik.
