Astanada erekshe balalarǵa arnalǵan oıyn alańy ashyldy
ASTANA. QazAqparat - «Kunshyaq» ınklıýzıvti platformasy ákimdiktiń jáne «Rotarı-klýb Astana» qoǵamdyq birlestiginiń bastamasymen quryldy. 29 qyrkúıekte astanada múmkindigi shekteýli balalarǵa arnalǵan oıyn alańy ashyldy. Ol «Qazaqstan» sport kesheni ǵımaratynyń aldyndaǵy alańda ornalasqan, dep habarlaıdy QazAqparat elorda ákimdiginiń baspasóz qyzmetine silteme jasap.
Joba úshin arnaıy 1382 sharshy metr alań aýmaǵy bólindi. Alańda 42 túrli qural-jabdyq bar. Munda arba-oryndyǵymen birge shyǵa alatyn múmkindigi bar oıyn keshenderi, qaýipsiz átkenshekter, laıyqtalǵan qum-oryndyqtar, arnaıy taktıldi panelder ornatylǵan.
Alańnyń saltanatty ashylýyna astana ákimdiginiń ókilderi, «Rotarı-klýb Astana» qoǵamdyq birlestiginiń prezıdenti Lázzat Alshynova, AQSh jáne Norvegııa elshiliginiń ókili, «Qasıetti jol» qaıyrymdylyq qorynyń jáne DTsP balalardy ońaltýdaǵy mamandandyrylǵan ortalyqtyń prezıdenti Gúlmıra Ábeldınova qatysty.
«Astana qalasy ákimdiginiń atynan osy alańnyń ashylýyna qatysqandardyń barlyǵyna alǵysymdy aıtqym keledi. Alań óte yńǵaıly jáne qala úshin óte qajet oryn. Mundaı jobalar qalada áli de kóbeıe túspek. Qalada tek qaýipsizdikti ǵana qamtamasyz etetin emes, bizdiń barlyq turǵyndar úshin de arnaıy baǵdarlamalar bar. Bul joba kózge aıtarlyqtaı túsedi dep oılaımyn. Bizdiń balalarymyzdy ákimdik daıyndap otyrǵan taǵy bir syılyq kútip turǵanyn habarlaı ketkim keledi», - dedi Astana qalasy ákiminiń orynbasary Ermek Amanshaev. 
Qazaqstandaǵy zertteýlerge qarasaq, múmkindigi shekteýli balalar óziniń qatarlastarynan medıtsınalyq kórsetkish boıynsha emes, áleýmettik jaǵynan kenje qalyp qoıǵan, ıaǵnı belsendi túrde aınalysý, qarym-qatynas jáne qozǵalys oıyndary joq. Demek, ınklıýzıvti oıyn alańyn qurý - erekshe kútimdegi balalardyń ıgiligi úshin jasalǵan kezekti qadam.
«Kádimgi alańdarda arbaǵa tańylǵan balalar átkenshek pen syrǵanaqty paıdalana almaıdy. Oınaǵysy keledi, biraq múmkindigi shekteýli. Al mundaǵy átkenshekke arbasymen otyryp, ózdiginen terbele alady. Barlyǵy tamasha jasalǵan. Barlyq balalar úshin osyndaı jobalar ashylyp, búldirshinder árdaıym qýanyp júrse eken. Sebebi, eń bastysy - balanyń bal kúlkisi», - deıdi erekshe balanyń ájesi Darııa Rahımova. 
