Astanada erekshe balalardyń ata-analaryn qorlaǵan bloger ustaldy

ASTANA. KAZINFORM — Astana polıtsııasy áleýmettik jelide múmkindigi shekteýli balalardyń ata-analaryn qorlaǵan blogerdi ustady. Usaq buzaqylyq faktisi boıynsha ákimshilik is qozǵaldy jáne materıaldardy sotqa joldaýǵa daıyndap jatyr.  

Eske sala ketsek, daýly beınejazba áleýmettik jelide jarııalandy. Áıel óz beınejazbasynda erekshe balalardyń dúnıege kelýin «azǵyndyq» jáne ata-anasyna jiberilgen «jaza» dep aıtqan. Bul erekshe bala ósirip otyrǵan ata-analardyń  narazylyǵyn týdyrdy. 

Balalar quqyqtary jónindegi ýákil Dınara Zákıeva vıdeoǵa qatysty Іshki ister mınıstrligine quqyqtyq baǵa berýdi surap, ótinish jibergen.

Astana qalalyq polıtsııa departamentiniń baspasóz qyzmeti oqıǵaǵa qatysty túsinik berdi.

— Blogerdiń erekshe balalardyń ata-analaryna qatysty ádepsiz jáne qorlaıtyn sózderi bar beınejazbany ınternet keńistiginde taratý faktisi boıynsha ákimshilik is qozǵaldy. Jarııalanym avtory ustalyp, polıtsııa bólimine jetkizildi. Usaq buzaqylyq faktisi boıynsha materıaldar jınaldy, olar sheshim qabyldaý úshin sotqa jiberiledi, — dep habarlady polıtsııa.

Astana qalasy polıtsııa departamenti ınternette qorlaıtyn materıaldardy taratqan adam qoldanystaǵy zańnamaǵa sáıkes jazalanatynyn eske saldy.

Buǵan deıin Májilis depýtaty Nartaı Sársenǵalıev prank barysynda qoǵamdyq tártipti buzǵandardyń biryńǵaı tizimin jasap, ony jarııalaý qajet ekenin aıtqan bolatyn.