Astanada Erbol Otarbaevtyń erligin áspettegen fılminiń tusaýy kesildi
ASTANA. QazAqparat - Elordanyń «Qazaqstan» kontsert zalynda Ulttyq ulan jaýyngerleriniń qaısarlyǵy men Erbol Otarbaevtyń erligi týraly túsirilgen «Altynshy beket» fılminiń tusaýkeseri boldy, dep habarlaıdy «QazAqparat» HAA tilshisi.
Kórkem fılm Ulttyq ulannyń 2017-2019 jyldarǵa arnalǵan arnaıy ımıdjdik baǵdarlamasyn oryndaý aıasynda QR Aqparat jáne kommýnıkatsııalar mınıstrliginiń tapsyrysy boıynsha túsirilgen. Týyndyny kópshilikke qazaqstandyq «AıÝ SINEMA» kınokompanııasy men «Habar» agenttigi usyndy.
«Sol bir oqıǵa bolǵan ýaqytta Erbol Otarbaev bar-joǵy 19 jasta bolǵan. Erboldy úlgi ete otyryp, búgingi jas urpaqty tárbıeleýimiz kerek. Men óz basym osynaý erlikke nazaryn aýdarǵan bizdiń Úkimetke, «Habar» agenttigine, «AıÝ SINEMA» kınokompanııasynyń basshylyǵyna zor alǵysymdy bildiremin. Sebebi, jaýyngerlerimizdiń batyrlyǵyn biz kóp jaǵdaıda umytyp ketip jatamyz. Al bizdiń jigitterdiń erligi - jas urpaqqa úlgi bola bilýi kerek. Búgingi kúni men bizdiń áskerde eń laıyqty jaýyngerler qyzmet etip júr dep nyq senimmen aıta alamyn», - dedi tusaýkeser alyndaǵy baspasóz máslıhaty kezinde Ulttyq ulannyń bas qolbasshysy Rýslan Jaqsylyqov.
Sıýjet jelisine Ulttyq ulannyń jaýyngeri Erbol Otarbaevtyń 2010 jylǵy 22 maýsymda Aqtaý qalasyndaǵy túzeý mekemesin kúzetý boıynsha qaraýyl qyzmetinde turǵan kezindegi janqııarlyq erligi negiz bolǵan. Sol kezde jas jaýynger qatań tártiptegi kolonııadan qashpaq bolǵan 21 jazasyn óteýshiniń jolyna jalǵyz ózi tosqaýyl qoıa bilgen. Osy erligi úshin Erbol Memleket basshysynyń Jarlyǵymen ІІ dárejeli «Aıbyn» ordenimen marapattalǵan bolatyn. Búgin de Erbol Ulttyq ulannyń ofıtseri.
Tusaýkeser aldynda týyndynyń túsirilim toby qyzyl kilemmen júrip ótti. Tusaýkeserge Parlament Májilisiniń depýtattary, mınıstrlikterdiń, kúsh qurylymdary men Astana qalasy ákimdigi, BAQ ókilderi qatysty.
Týyndyda basty rólderdi elimizge tanymal Sanurjan Súleımenov, Jasulan Ómirbek, Serik Salqynbaev, Erbolat Toǵyzaqov, Saıat Isembaev, Qajymuqan Qalymbetov, Jandos Jumaǵulov jáne taǵy basqa akterlar somdaǵan. Muhametqalı Satovtyń ıdeıasymen túsirilgen týyndynyń bas prodıýsseri Danııar Ibragımov, rejısseri Serikbolsyn Ótepbergenov.
Kórkem fılmdi 15 naýryzdan bastap kınoteatrlardan kórýge bolady.
