Astanada er adamnyń ústinen polıtsııaǵa bir kúnde úsh shaǵym tústi
ASTANA. KAZINFORM — Astanada 47 jastaǵy er adamnyń ústinen bir kúnde polıtsııaǵa úsh ret shaǵym tústi.
Polıtsııanyń habarlaýynsha, alǵashqy oqıǵa qalalyq avtobýsta bolǵan. Mas kúıinde bolǵan er adam balaǵat sózder aıtyp, jolaýshy áıelmen janjaldasqan. Qala turǵyny polıtsııaǵa júgindi.
Avtobýstan túskennen keıin ol aıaldamada taǵy bir áıelmen sózge kelip, oǵan da ádepsiz sózder aıtqan. Keıinirek er adam velosıpedshimen janjaldasyp, onyń velosıpedin laqtyryp jibergen. Osy oqıǵadan keıin velosıpedshi de polıtsııaǵa aryzdanǵan.
Polıtsııa qyzmetkerleri quqyq buzýshynyń jeke basyn anyqtap, ony ustady. Ol eki ret usaq buzaqylyq jasaǵany jáne qoǵamdyq orynda mas kúıinde júrgeni úshin sot sheshimimen 10 táýlikke ákimshilik qamaýǵa alyndy.
Eske salaıyq, buǵan deıin Tarazda 14 jastaǵy qyz bir aptada úsh ret polıtsııaǵa ustalǵanyn habarlaǵan edik.
