Astanada er adam satýshyny oıynshyq tapanshamen tonamaq bolǵan
ASTANA. QazAqparat - Astana qalasynyń Almaty aýdandyq №2 sotynda oıynshyq tapanshamen qaraqshylyq jasaý jáne evakýatormen kólik urlaýǵa qatysty qylmystyq ister qaraldy, dep xabarlaıdy QazAqparat tilshisi.
Sot materıaldaryna sáıkes, ótken jyly jeltoqsan aıynda er azamat gúl satatyn dúkendi tonamaqshy bolyp, oıynshyq tapanshamen satýshyny qorqytqan. Tapanshany áıeldiń basyna taqap, 16 000 teńgeni tartyp alǵysy kelgen. Alaıda gúl satýshy kelinshek dabyl túımeshegin basyp úlgergen. Qaraqshy taıyp turǵan. Biraq quqyq qorǵaýshylardyń qolyna tústi. Sot qaýlysyna sáıkes, oǵan 4 jylǵa bas bostandyǵyn shekteý jazasy taǵaıyndaldy.
Budan bólek, evakýatormen kólik urlaǵan D. esimdi azamatqa qatysty sheshim shyǵaryldy. Ol «Mersedes-Bens» markaly kólikti urlaımyn dep, evakýator jaldaǵan. Alaıda evakýatordyń eki júrgizýshisine kóliktiń basqa bireýdiń múligi ekenin aıtpaǵan.
"Astana qalasynyń Almaty aýdandyq №2 sotynyń qaýlysy boıynsha D. esimdi azamat Qylmystyq kodekstiń 188-baby, 3-tarmaǵy boıynsha kináli dep tanylyp, 2 jyl 3 aıǵa shartty túrde bas bostandyǵynan aıyrý jazasyna kesildi", - delingen sottyń resmı xabarlasynda.
