Astanada buryn birge turǵan áıelin órtep jiberemin dep qorqytqan er adam sottaldy
ASTANA. KAZINFORM — Astanada er adam buryn birge turǵan áıeline qatysty quqyqqa qaıshy áreket jasap, sottaldy. Ol áıeldiń jumys ornyna janǵysh suıyqtyq quıylǵan bótelkemen kelip, ony órtep jiberemin dep qorqytqan.
Astana prokýratýrasynyń málimetinshe, oqıǵa qyzǵanyshtan bolǵan. Er adam burynǵy qarym-qatynasyn qalpyna keltirýdi kózdegen. Alaıda keıin ol áıeldiń ústine janǵysh suıyqtyq quıyp, onyń ómirine naqty qaýip tóndirgen.
— Sotta memlekettik aıyptaýshy sottalýshynyń kinásin dáleldedi. Sot úkimimen oǵan 60 saǵat qoǵamdyq jumys jazasy taǵaıyndalyp, minez-qulqyna birqatar arnaıy talap qoıyldy. Sonyń ishinde jábirlenýshige jaqyndaýǵa tyıym salyndy, — delingen habarlamada.
Úkim ázirge zańdy kúshine engen joq.
Prokýratýra azamattardy ómiri men qaýipsizdigine qater tóngen jaǵdaıda dereý quqyq qorǵaý organdaryna júginýge úndedi. Vedomstvonyń málimetinshe, qorqytý men qýdalaýdy qosa alǵanda, azamattardyń ómirine, densaýlyǵyna jáne qol suǵylmaýshylyǵyna qarsy áreketter zańda belgilengen jaýapkershilikke ákep soǵýy múmkin.
Eske salaıyq, buǵan deıin Shymkentte áıelin aıaýsyz uryp-soqqan er adam ustalǵanyn habarlaǵan edik.
