Astanada er adam buryn ózi kúzetken nysannan 21 mln teńgeniń kabelin urlap ketken
ASTANA. KAZINFORM — Astana polıtseıleri iri kólemdegi urlyq qylmysyn ashty. 31 jastaǵy turǵyn kezinde ózi kúzetshi bolyp jumys istegen nysannan mıllıondaǵan teńgeniń elektr kabelin urlady degen kúdikke ilindi.
Tergeý málimetinshe, er adam nysannyń aýmaǵyna erkin kirip, elektr kabelin jasyryn túrde alyp ketken. Urlanǵan múliktiń jalpy quny — 21 mıllıon teńge.
Jedel-izdestirý is-sharalary barysynda kúdiktiniń jeke basy anyqtalyp, ol qolǵa tústi. Qazirgi ýaqytta kúdikti ýaqytsha ustaý ızolıatoryna qamaldy.
— Ol nysannyń qurylymyn, kúzet júıesin jáne materıaldyq qundylyqtardyń ornalasýyn jaqsy bilgen. Osyny paıdalanyp, qylmysqa barǵan, — delingen polıtsııanyń baspasóz qyzmeti taratqan habarlamada.
Atalǵan derek boıynsha sotqa deıingi tergep-tekserý júrgizilip jatyr.
Eske salaıyq, buǵan deıin Qaraǵandyda qaraqshylyq shabýyl men urlyq jasaǵan er adam ustalǵanyn jazǵanbyz.
