Astanada epıdemııalyq maýsym bastalǵaly tumaý aýrýynyń 141 deregi tirkeldi

ASTANA. QazAqparat - Astana qalasynyń ákimi Ádilbek Jaqsybekovtiń tóraǵalyǵymen ótetin elorda ákimdiginiń apparat otyrysynda apta saıyn qalanyń tynys-tirshiliginiń ózekti máseleleri talqylanady. Búgin qalanyń sanıtarlyq jaǵdaıy, densaýlyq saqtaý jáne quqyqtyq tártipti qamtamasyz etý máseleleri qaraldy, dep habarlady elorda ákimdiginiń baspasóz qyzmeti.

Bıyl Astanada Jiti respıratorlyq vırýsty ınfektsııaǵa shaldyǵý jaǵdaıy ótken maýsymǵa qaraǵanda 16% tómen bolyp, qaladaǵy epıdemıologııalyq jaǵdaı turaqty dep baǵalanǵanymen, JRVI men tumaýdyń aldyn alý boıynsha profılaktıkalyq sharalar tolyq dárejede júrgizilýde, ásirese densaýlyq saqtaý jáne bilim berý uıymdarynda.

Astanada JRVI men tumaýǵa shaldyqqandardyń basym bóligin 14 jasqa deıingi balalar quraıdy. Juqpaly aýrýlar statsıonarlarynda JRVI dıagnozymen 304 naýqas emdelip jatyr. Qarasha aıynan beri tumaýmen aýrýdyń 141 jaǵdaıy tirkeldi, naýqastardyń barlyǵy saýyǵyp shyqty. Jaǵdaı baqylaýǵa alyndy. Tıisti basqarmalarǵa epıdemııaǵa qarsy is-sharalardy kúsheıtý maqsatynda tumaýdyń aldyn alý boıynsha aqparattyq-túsindirý jumystaryn jalǵastyrý tapsyryldy.

«Eń aldymen azamattardyń densaýlyǵyn qorǵaýymyz kerek. Ótken jylmen salystyrǵanda tumaýǵa shaldyǵý jaǵdaılarynyń bıylǵy kórsetkishteri tómen dep qol qýsyryp otyrýǵa bolmaıdy. Barlyq aldyn alý is-sharalaryn tolyq dárejede jáne halyqty barynsha qamtyp júrgizý qajet», - dedi Á. Jaqsybekov.

Búginde Jedel medıtsınalyq járdemniń jedel jetý máselesi de ózekti bolyp otyr. Densaýlyq saqtaý basqarmasynyń basshysy Erik Baıjúnisov usynǵan aqparat boıynsha shaqyrýlarǵa jedeldiliktiń belgilengen alty sanaty boıynsha qyzmet kórsetiledi. Jaı kúnderi 1200-1500 shaqyrý kelip túsedi, al «vırýsty» ınfektsııalarǵa shaldyǵý jaǵdaılarynyń maýsymyq kóbeıýine oraı jedel járdem qyzmetine túsetin júkteme 3 esege artyp otyr. Qazirgi kezde Astanada 92 «jedel járdem» kóligi bar, ú.j. naýryz aıynyń ortasynda Jedel medıtsınalyq járdemdi jańǵyrtý jónindegi keshendi jospardy iske asyrý aıasynda qosymsha 42 mashına satyp alynady. E. Baıjúnisovtyń aıtýynsha, bul máseleni sheshýge yqpal etedi.

Sonymen qatar, kún tártibine qalada quqyqtyq tártipti qamtamasyz etý máselesi de shyǵaryldy. Bul rette jasóspirimder arasynda qylmystyń aldyn alýǵa erekshe nazar aýdaryldy. Osyǵan baılanysty quqyq qorǵaý organdary men bilim basqarmasynyń birlesip jumys isteýiniń mańyzdylyǵy atap ótildi.

Budan basqa, otyrysta ákimshilik aıyppuldar tóleý máselesi de kóterildi. Jergilikti polıtsııaǵa jeke menshikti sot oryndaýshylarymen ózara is-qımyldy jolǵa qoıý tapsyryldy.

«Júrgizýshi aıyppul tólemegeni úshin de, buzýshylyq jasaǵany úshin de jazaǵa tartylatynyn túsinýi kerek. Sonda ǵana joldarda tártip bolady», - dedi qala basshysy.

Otyrys qorytyndysy boıynsha barlyq memlekettik mekemelerge buǵan deıin berilgen tapsyrmalar boıynsha tekserý júrgizý jáne atqarýshylyq tártip ornatý tapsyryldy.