Astanada epıdemııalyq kezeń bastalyp ketti — dáriger
ASTANA. KAZINFORM — Sýyq aýa raıynda vırýstardyń belsendiligi artady. Bul týraly jalpy tájirıbeli dáriger«Búgin LIVE» baǵdarlamasyna bergen suhbatynda aıtty.
— Jalpy sýyq aýa raıynyń kelýimen epıdemııalyq kezeń bastalady. Osy ýaqytta vırýstar men bakterııalar belsendi túrde taraıdy. Bir adamnyń ekinshisine juqtyrý qaýpi artady. Ásirese Astana qalasynda bul kezeń qazirdiń ózinde bastalyp ketti. Sol sebepti 1 qazannan bastap medıtsınalyq mekemelerde betperde taǵý usynyldy, — deıdi Jazıra Qydyrbaeva.
Maman vırýstardan qorǵaný úshin vaktsına salýdy usyndy.
— Qyrkúıektiń sońynan bastap bizge Reseıden vaktsına keldi. Ony medıtsınalyq qyzmetkerler, balalar, júkti áıelder men jıi aýyratyn balalar sala alady. Zeınetkerler men esepte turǵandar da josparly túrde vaktsınatsııadan óte alady. Bul alǵashqy jasandy ımmýndyq júıeni qalyptastyrý úshin jasalǵan profılaktıkalyq sharamyz, — dedi ol.
Dáriger vaktsına saldyrǵysy kelmeıtin azamattarǵa tabıǵı ımmýndyq júıeni saqtaýǵa keńes berdi.
— Vaktsınatsııadan bas tartqan jaǵdaıda nemese qarsy kórsetkishteri bolsa, tabıǵı ınmýndyq júıeni durys tamaqtaný ne qorǵaný arqyly saqtaý qajet. Sýyqtan saqtaný tek syrtqy kıimdi qabattap kııý emes. Betperde taǵyp, medıtsınalyq mekemelerde, ásirese aýyrǵan adamdardyń janynda barynsha saqtanyp júrý kerek. Jáne aýyryp úlgerse, juqtyrǵan vırýsynyń túrine qaraı jeke em taǵaıyndaý kerek, — dedi Jazıra Qydyrbaeva.
Stýdııa qonaǵy vırýs juqtyrǵan adamnyń belgilerine toqtaldy.
— Eger sizdiń aýyrǵan adammen qoldanǵan zattaryńyz tikeleı qarym-qatynasta bolatyn bolsa, 2–24 saǵat aralyǵynda sizde de belgileri baıqala bastaıdy. Sebebi grıpp joǵary kontagıozdy vırýs. Adam grıppen aýyrsa, dene qyzýy birden 40 gradýsqa deıin kóterilip, bas qatty aýyrady. Del-sal kúı keship, bulshyq etteri aýyrsynyp, álsirep jatyp qalady. Al ózge vırýstarda 1–2 kún aldyn murynnan sý aǵyp, tamaq aýrýy syndy belgilermen bastalady, — dedi maman.
Aıta keteıik, Pavlodar aımaǵynda joǵary patogendi qus tumaýy taralýy múmkin.