Astanada energetıkalyq kásiporyndar aýaǵa shyǵaratyn zııandy zattar mólsheri 22% tómendedi
ASTANA. QazAqparat - Elordada atmosferany jaqsartý maqsatynda oryndalǵan jumystar ótken jylmen salystyrǵanda energetıkalyq kásiporyndardyń aýa shyǵaratyn zııandy zattar mólsherin 22% azaıtýǵa múmkindik berdi.
Bul týraly Astana ákimdiginiń resmı saıtynda habarlady.
Jyl basynan beri lastanýdyń ortasha ındeksi 4,2 birlikke jýyq boldy, «Qazgıdromet» RMK gradatsııasy boıynsha bul tómen kórsetkish bolyp tabylady. Jalpy alǵanda, qalada aýa basseıniniń kórsetkishi halyqtyń tirshilik etýine ekologııalyq qolaıly. Bul rette aýanyń lastanýynyń negizgi kózderi kólikter, jylý energetıkalyq kásiporyndar, avtonomdy qazandyqtar men jeke sektor bolyp tabylady.
Aýa basseınin jaqsartý maqsatynda 2015-2016 jj. arnalǵan Astana qalasynda atmosferalyq aýa sapasyn jaqsartý jónindegi keshendi is-sharalar jospary bekitilip, júzege asyrylýda. Jospardyń tarmaqtarynyń biri «Astana-Energııa» AQ tabıǵat qorǵaý sharalary men kólik quraldarynyń aýa lastaýshy zattar shyǵarýyn baqylaý bolyp tabylady.
«Astana-Energııa» AQ qyzmetinen zııandy zattardyń emıssııasyn monıtorıngteý jumystary kórsetkendeı, 2015 jyldyń 9 aıynda zııandy zattar shyǵarý kólemi 2014 jyldyń sáıkes merzimimen salystyrǵanda 22% (jylyna 34,7 myń tonnadan 27,2 myń tonnaǵa deıin) tómendegen, sonyń ishinde azot totyǵynyń kólemi 19% (jylyna 1,7 myń tonna) jáne kúkirt dıoksıdi 21% (jylyna 3,9 myń tonna) azaıdy.
Sonymen qatar, JEO-2 kúl úıindisiniń №1 uıashyǵynda topyraq qunarlyǵyn tehnıkalyq jáne bıologııalyq jaǵynan qalpyna keltirý jumystary aıaqtaldy, JEO-2 kúl úıindisiniń №2 uıashyǵynda jáne JEO-1 kúl úıindilerinde topyraq qunarlyǵyn tehnıkalyq jaǵynan qalpyna keltirý jumystary bastalyp ketti. Atalǵan sharalar qatty zııandy zattardyń (shańnyń) aýaǵa shyǵarylý kólemin 35% (jylyna 2,2 myń tonnaǵa) azaıtýǵa múmkindik berdi.
2015 jyly Astana-Qaraǵandy jáne Astana-Kókshetaý tas joldaryndaǵy beketterde benzınmen jáne dızeldik otynmen júretin 440 avtomashına tekserildi. Sonyń ishinde 36 jaǵdaıda paıdalanylǵan gaz kontsentratsııasy ruqsat etilgen shekten artyq bolǵan, ákimshilik polıtsııa qyzmetkerlerimen 36 ákimshilik hattama toltyryldy.
