Astanada endaýment qorlardyń forýmy ótip jatyr
ASTANA. KAZINFORM – L.Gýmelev atyndaǵy Eýrazııa ulttyq ýnıversıtetinde endaýment qorlardyń forýmy bastaldy.
Endaýment qorlardyń jumysyn tsıfrlyq tehnologııalar arqyly jetildirý máselesine arnalǵan jıynǵa halyqaralyq endaýment qorlar da shaqyrylǵan. Eýrazııa ulttyq ýnıversıtetiniń strategııa jónindegi prorektory Dýman Aıtmaǵambetov osymen tórtinshi ret ótip jatqan forýmnyń basty maqsaty sheteldiń ozyq tájirıbelerin endaýment qormen jumys isteýge bet burǵan Qazaqstannyń joǵary oqý oryndaryna taratý ekenin aıtady.
«Eki jyl buryn bizdiń ýnıversıtette de endaýment qor qurylǵan. Sodan keıin ózge ýnıversıtetter tájirıbemizdi surap, habarlasa bastady. Sol kezde shetelden jaqsy qorlardyń ókilderin shaqyrtyp, olardyń tájirıbesin taratsaq degen oı paıda boldy. Bıyl tórtinshi ret endaýment qorlardy jınap, tájirıbe almasyp jatyrmyz. Forýmǵa Amerıka Qurama Shtattaryndaǵy Mınnesota ýnıversıtetiniń, reseılik endaýmentterdiń ókilderi keldi. Qazaqstanda da jumysyn sátti bastaǵan qorlar bar. Olardyń da tájirıbesi qyzyq bolady dep oılaımyn. Bizge habarlasqan ýnıversıtetter endaýmentke donor bolatyn adamdardy, ınvestorlardy qalaı tartý kerektigin suraıdy. Osy turǵydan alǵanda búgingi jıynnyń bereri kóp», - deıdi prorektor.
Onyń aıtýynsha qazaqstandyq ýnıversıtetter endaýment qormen jumys isteýge endi ǵana kirisken. Al Eýropa men AQSh-ta mundaı qorlar 100-200 jyldan beri jumys istep keledi.
«Bizdiń ýnıversıettetiń 70 myńnan astam túlegi bar bolsa, sonyń 100-den astamy endaýment qorymyzǵa donor bolyp otyr», - deıdi ol.
Mınnesota ýnıversıteti janyndaǵy endaýment qordyń qyzmetkeri Sıýzen Holtor AQSh-ta endaýment qorlardyń mańyzy zor ekenin aıtady.
«Bizdiń ýnıversıtettiń endaýment qory 17 baǵytta jumys isteıdi. Jyldyń ınvestıtsııa tabysy ondaǵan mıllıon dollarmen esepteledi. AQSh-taǵy ýnıversıtetter janyndaǵy keıbir endaýment qorlardyń aktıvindegi aqsha 50 mlrd dollar deıin barady. Osy 50 mlrd teńgeniń aktıvterinen túsetin ınvestıtsııalyq tabysty óz qajetine paıdalanyp otyr. Qazaqstandaǵy joǵary oqý oryndarynyń da osy baǵytqa bet burǵany qýantady. Bul baǵytta bar bilgenimizdi osyndaǵy áriptesterimizben bólisýge daıynbyz», - deıdi ol.
Aıta ketý kerek, endaýment qordyń ózge qorlardan aıyrmashylyǵy jınalǵan aqshanyń negizgi somasy eshqaıda jumsalmaıdy. Qordyń aınalymyndaǵy qarajat túrli qundy qaǵazdarǵa, oblıgatsııalar men depozıtterge ınvestıtsııalanady. Sodan túsken ınvestıtsııalyq tabys qana qordyń maqsatyna ıgeriledi.
