Astanada eńbekti qorǵaýǵa arnalǵan halyqaralyq konferentsııa jáne kórme ótedi
ASTANA. KAZINFORM – Búgin QR Eńbek jáne halyqty áleýmettik qorǵaý mınıstri Asqarbek Ertaevtyń tóraǵalyǵymen apparattyq keńes ótti, dep habarlaıdy mınıstrliktiń baspasóz qyzmeti.
Jıynnyń basty máseleleriniń biri – «KIOSH-2026» 14-shi qazaqstandyq halyqaralyq eńbekti qorǵaý jáne ónerkásiptik qaýipsizdik konferentsııasy men kórmesine daıyndyq barysy boldy.
Іs-shara 2026 jylǵy 28–30 sáýir aralyǵynda Astana qalasyndaǵy «EXPO» halyqaralyq kórme ortalyǵynda ótedi. Ol dástúrli túrde memlekettik organdar, bıznes, kásipodaqtar, halyqaralyq uıymdar ókilderi men sarapshylar qaýymdastyǵynyń ashyq dıalogyna arnalǵan negizgi alańǵa aınalmaq.
Keńes barysynda aldaǵy konferentsııanyń basty baǵyty – eńbek qaýipsizdigi salasyna tsıfrlyq sheshimderdi ıntegratsııalaý bolatyny atap ótildi.
Atap aıtqanda, eńbek táýekelderiniń tsıfrlyq kartasynyń jumysyn jáne ony odan ári damytýdy, sondaı-aq qaýipsizdikti preventıvti basqarýdaǵy jasandy ıntellekt múmkindikterin tanystyrý josparlanýda.
KIOSH-2026 baǵdarlamasy 100-den astam kompanııa men jetekshi halyqaralyq sarapshylardyń qatysýymen ótetin paneldik sessııalardy, «Vision Zero» tujyrymdamasyn talqylaýdy, sondaı-aq jastardy tartý jáne eńbekti qorǵaý salasyndaǵy mamandyqtardy dáripteý boıynsha jeke blokty qamtıdy.
Konferentsııaǵa daıyndyqtan bólek, keńeste arnaýly áleýmettik qyzmetter salasynda jan basyna shaqqandaǵy qarjylandyrýdy engizý máseleleri, sondaı-aq basym normatıvtik quqyqtyq aktilerdiń iske asyrylý barysy qaraldy.
Mınıstr Asqarbek Ertaev óńirlik jumyspen qamtý kartalarynyń tıimdi oryndalýyn erekshe qadaǵalaýdy jáne barlyq baqylaýdaǵy tapsyrmalar boıynsha oryndaýshylyq tártipti kúsheıtýdi tapsyrdy.
Osyǵan deıin Eńbek mınıstrliginiń 2030 jylǵa deıingi kóshi-qon saıasaty tujyrymdamasy jobasyn ázirlegeni týraly jazdyq.