Astanada eńbek jáne ónerkásip qaýipsizdiginiń kórme-konferentsııasy ashyldy
ASTANA. 25 sáýir. QazAqparat - Búgin Astanadaǵy «Kórme» ortalyǵynda Qazaqstandaǵy eńbek jáne ónerkásip qaýipsizdigi boıynsha (KIOSH - Kazakhstan International Occupational Safety & Heath Conference) III Halyqaralyq kórme-konferentsııasy ashyldy.
28 sáýir - Dúnıejúzilik eńbekti qorǵaý kúni qarsańynda ótip otyrǵan sharada munaı-gaz, taý-ken metallýrgııasy, hımııa ónerkásibi, kólik jáne ınfraqurylym, qurylys ındýstrııasy jáne taǵy basqa salalarda eńbek qaýipsizdigin qamtamasyz etýge arnalǵan ónim men qyzmet túrleri usynylyp otyr. Jalpy, kórmege Qazaqstan, Reseı jáne Ýkraınanyń 43 kompanııasy qatysýda. Stend-qurylǵylardyń basym bóligi otandyq kompanııalarǵa tıesili. Al «Eńbekti qorǵaý jáne ónerkásiptegi qaýipsizdik salasyndaǵy memlekettik saıasat» taqyrybyndaǵy konferentsııada óndiriste jaraqat alý jáne jazataıym oqıǵalardy azaıtyp, eńbek ónimdiligin arttyrý máselesi talqylanýda. Kórme-konferentsııa eki kúnge sozylady.
