Astanada eńbek adamdaryna qurmet kórsetti
ASTANA. QazAqparat - Astana qalasynyń Kásipodaq úıiniń ǵımaratynda Eńbek kúnin merekeleýge arnalǵan qalalyq eńbek forýmy ótti, dep habarlaıdy elorda ákiminiń resmı saıty .
Forým aıasynda «Eńbek joly» qalalyq konkýrsynyń «Úzdik eńbek áýleti», «Jumys isteıtin jastardyń úzdik tálimgeri» jáne «Óndiristiń úzdik jas mamany» nomınatsııasy boıynsha jeńimpazdar jáne kásipteri boıynsha úzdikter dıplomdarmen jáne baǵaly syılyqtarmen marapattaldy.
Onlaın-daýys berýdiń jáne Astana qalasy ákimdiginiń janyndaǵy «Eńbek joly» konkýrsynyń jeńimpazdaryn anyqtaý jónindegi komıssııa sheshiminiń qorytyndylary boıynsha «Eńbek joly» konkýrsynyń «Úzdik eńbek áýleti» nomınatsııasy boıynsha 1 oryndy Bazarbaevtar áýleti ıelendi. Temirjol kóligi salasyna otbasynyń 15 múshesi óz úlesterin qosqan. Áýlettiń jalpy eńbek ótili - 739 jyl.
2 oryndy Nosıevter áýleti ıelendi. Bilim salasyna ózderiniń úlesterin otbasynyń 14 múshesi qosyp otyr. Áýlettiń jalpy eńbek ótili - 327 jyl.
3 oryn Raqymjanovtar áýletine berildi. Áýlettiń basshysy Raqymjanov Abdýla Tóknuly «Astana sý arnasy» ShJQ MKK №3 ýchaskesiniń tehnıkalyq qyzmet kórsetý ortalyǵynyń sheberi. Sonymen qatar atalǵan kásiporynda jubaıy men qyzy da eńbek etedi. Áýlettiń jalpy eńbek ótili - 57 jyl.
«Jumys isteıtin jastardyń úzdik tálimgeri» nomınatsııasy boıynsha 1 oryndy «Astana-aımaqtyq elektrjelilik kompanııasy» AQ qosalqy stansa qyzmetiniń 1 toptaǵy aǵa masteri Baısaldın Qastaı Sárýaruly, 2 oryndy «№ 5 Qalalyq emhana» ShJQ MKK-nyń bas dárigeriniń medıtsınalyq qyzmet kórsetýdi baqylaý jónindegi orynbasary Moldaǵalıeva Gúlnar Shahmanqyzy jáne 3 oryndy «Qazposhta» AQ «Astanalyq poshta»astanalyq fılıalynyń oqytý jáne damytý jónindegi bas mamany Kerveneva Gúlmaǵıza Erejepqyzy ıelendi.
«Óndiristiń úzdik jas mamany» nomınatsııasy boıynsha 1 oryndy «Qazahtelekom» AQ «Astanatelekom» fılıalynyń óńirlik telekommýnıkatsııa dırektsııasynyń jetekshi mamany Jeksembaev Saıat Qabdrǵalıuly, 2 oryndy «Astana sý arnasy» ShJQ MKK synaý zerthanalarynyń qarapaıym laboranty Qalıev Shernııazdan Serikuly jáne 3 oryndy «Qazposhta» AQ «Astanalyq poshta» astanalyq fılıalynyń №4 sálemdemeler sýpermarketiniń baılanys operatory Danıarova Dına Asqarqyzy ıelendi.
Forýmǵa atqarýshy jáne ókiletti organdardyń, kásipodaq, úkimettik emes uıymdardyń, jumys berýshilerdiń, jumysshylardyń, BAQ-nyń ókilderi qatysqanyn atap ótýge bolady. Uıymdastyrýshylar: Astana qalasynyń ákimdigi, Kásipodaq ortalyǵy jáne Kásipkerler palatasy.
