Astanada eń úzdik arhıtektýralyq jobalar baıqaýy ótip jatyr
ASTANA. QazAqparat - Astanada BI GROUP ARCHITECTAWARDS birinshi halyqaralyq sáýlet baıqaýynyń fınaly ótip jatyr, dep habarlaıdy QazAqparat tilshisi.
Búgingi saıysta Reseı, Ýkraına, Lıtva jáne Qazaqstannan kelgen 20 jas sáýletshi óz jobalaryn qorǵap jatyr. Olar konkýrsqa qatysýǵa nıet bildirgen 300-ge jýyq adam arasynan iriktelip shyqqan.
«Fınalıster Qazaqstannyń túrli qalalary úshin mádenıet, densaýlyq saqtaý, bilim berý jáne sport salalary boıynsha daıyn sheshimder usynýy tıis. Olardyń arasynda kontsert zaldary, mýzeıler, saýyqtyrý ortalyqtary, mektepter, kolledjder, stýdenttik qalashyqtar, sporttyq ortalyqtar, basseın men ıahta klýb jobalary bar. Baıqaý qatysýshylary nysannyń bas jospary men dızaınyn ǵana emes, olardyń qurylysyna qajetti taldaý men ornalasatyn jerine deıingi aqparatty naqty kórsetken. Odan bólek, konkýrs talaptarynyń biri ınnovatsııalyq materıaldar men tehnologııalardy paıdalaný boldy.
«BI Group» kompanııasy qazirgi ekonomıka men qoǵam ómirine saı keletin jańa ónimderdi anyqtaýdy qalaıdy. Qatysýshylar da jan-jaqty. Eń bastysy, biz jańa ıdeıalardy, jas sáýletshilerdiń múmkindikteri men qalalardy qalaı damytýǵa bolatynyn kórip otyrmyz. Qyzyqty usynystar da joq emes. Áıtse de, jarystyń aty - jarys. Munda árbir sáýletshi jobanyń sáýletin ǵana emes, búkil fılosofııasyn oılastyrady. (...) Básekelestik arqyly óte jaqsy arhıtektýra paıda bolýy múmkin», - dedi qazylar alqasynyń múshesi, Qazaqstan Respýblıkasy sáýletshiler odaǵynyń prezıdenti Aqmyrza Rústembekov.
Baıqaý jeńimpazyna 15 myń dollarǵa aqshalaı sertıfıkat, BI Group qurylys holdınginiń jobaǵa tapsyrysyn jáne Eýropanyń jetekshi oqý oryndarynyń birinde profıldi kýrstardan ótýge joldama alady.
ІІ oryn úshin 10 myń dollar aqshalaı sertıfıkat jáne BI Group qurylys holdınginiń jobaǵa tapsyrysy qarastyrylǵan. Al ІІІ oryn ıegeri 5 myń dollarǵa aqshalaı sertıfıkat alady.
