Astanada eń úzdik aqqalaǵa baıqaý jarııalandy
ASTANA. QazAqparat - Astana qalasy Saryarqa aýdanynyń ákimdigi Jańa jyl qarsańynda erekshe baıqaý jarııalady, dep habarlaıdy QazAqparat.
«Saryarqa aýdanynyń eń kreatıvti aqqalasyna izdeý salamyz. Aýa raıy jylyp keledi, turǵyndardyń boı jazatyn ýaqyty jetti. ASTANA WINTERLAND ınteraktıvti biregeı oıyn-saýyq alańy aıasynda erekshe aqqalaǵa nemese qardan jasalǵan músinge baıqaý jarııalaýdy jón kórdik. Músindi jasaýda qııal ushqyrlyǵyna shekteý qoıylmaıdy», - dep jazdy Saryarqa aýdanynyń ákimi Arman Turlybek Feısbýktegi paraqshasynda.
Baıqaýǵa qatysý sharttary: óz úıiniń aýlasynda qardan músin turǵyzý, onymen birge sýretke túsip, #SaryarqaAqqalalary #SnegovıkıSaryarkı heshtegimen áleýmettik jelide jarııalaý.
«Eń úzdik aqqala ıesine demeýshilerden 100 myń teńge aqshalaı syıaqy daıyn. Árıne, ekinshi jáne úshinshi oryn alǵandar da nazardan tys qalmaıdy», - dedi A. Turlybek.
Aqqalalar baıqaýy qańtar aıynyń ortasyna deıin jalǵasady. 15 qańtar kúni baıqaý nátıjesi jarııalanady.
