Astanada emhanasy joq shaǵyn aýdandarda 3 ambýlatorııa ashylady
ASTANA. QazAqparat - Elordada medıtsınalyq kómektiń qoljetimdiligin qamtamasyz etý úshin aldaǵy bes jylda 10 jańa emhana salý qajet, dep habarlaıdy QazAqparat tilshisi. Bul týraly Astana qalasy Qoǵamdyq densaýlyq saqtaý basqarmasy basshysynyń orynbasary Álııa Rústemova elorda ákimdiginde ótken brfıngte málimdedi.
«Aldaǵy 5 jyldaǵy elordany damytý josparyn iske asyrý sheńberinde qansha densaýlyq saqtaý mekemesi qajet ekenin anyqtadyq. 2023 jylǵa deıin medıtsınalyq kómektiń qoljetimdiligin qamtamasyz etý úshin shamamen 25 mlrd teńgege 10 jańa emhana salý qajet. Biz halyqaralyq tájirıbeni zerttep, bıznes-qurylymmen birqatar kelissózder júrgizdik jáne bul máseleni memlekettik-jekeshelik áriptestik jolymen sheshemiz», - dedi Álııa Rústemova.
Onyń aıtýynsha, bıyl memlekettik-jekeshelik áriptestikpen elordada 3 ambýlatorııa ashylǵan. Bul mekemeler jańa «Jaǵalaý» shaǵynaýdanynda, halyq tyǵyz ornalasqan Baraev kóshesiniń boıynda jáne «Skazochnyı mır» turǵyn-úı kesheninde ornalasqan.
«Jyl sońyna deıin jeke ınvestıtsııalar esebinen «Óndiris» jáne «Prıgorodnyı» turǵyn alaptarynda emhana ashý josparlanyp otyr», - dep óz sózin tolyqtyrdy basqarma ókili.
Sondaı-aq, Qoǵamdyq densaýlyq saqtaý basqarmasynyń baspasóz qyzmeti bıyl Astananyń Esil aýdanynda (EXPO aımaǵy) 50 myńnan astam adamǵa qyzmet kórsetetin jańa medıtsınalyq keshenniń ashylatynyn habarlady.
Jalpy aýdany 12 myń sharshy metr bolatyn bul keshenniń quramynda aýrýhana men emhana bolady. Oǵan 7,5 mlrd teńge ınvestıtsııalanǵan.
