Astanada emdelip jatqan árbir besinshi naýqas basqa qaladan kelgen
ASTANA. QazAqparat - Astanada dárigerlerge arnalǵan júktemeni azaıtý men medıtsınalyq qyzmetterdiń qoljetimdiligin qamtamasyz etý úshin emhanalar jelisin damytýdyń tujyrymdamasy ázirlendi. Ol jınaqy dárigerlik ambýlatorııalar ashýdy qarastyrady, dep habarlaıdy QazAqparat ákimdiktiń saıtyna silteme jasap.
«Elordanyń densaýlyq saqtaý júıesiniń aldynda turǵan taǵy bir syn - halyqtyń jyl saıynǵy ósimi. Astanada bala týýdyń eń joǵary deńgeıi baıqalady. Orta eseppen táýligine 80-nen astam bala dúnıege keledi. Ótken jyly elordada 30 myńnan astam bala dúnıege kelse, jyl saıyn 100 myńnan astam operatsııa ótkiziledi», delingen habarlamada.
Qaladaǵy emhanalar búginde joǵary júktememen jumys isteýde. Dárigerlerdiń fızıkalyq qoljetimdiligin arttyrý úshin ótken jyldyń ekinshi jartysynda qala emhanalaryndaǵy 550 ýchaskege qosymsha 105 ýchaske ashyldy. Bul ýchaskelik dárigerlerdiń jumysyn aıtarlyqtaı tómendetýge múmkindik berdi. Buǵan deıingi júktemeniń bir dárigerge 2 500-3 000 adamnan bolýy naýqastarǵa qyzmet kórsetý sapasyna keri áser etti.
«Qazir ortasha eseppen jalpy tájirıbeniń bir dárigerine 1 700 adamnan aspaıdy. Bul EYDU elderiniń normasyna sáıkes keledi. Sonymen qatar, medıtsınalyq mekemelerdiń jumysynyń kóbeıip ketti jáne basqa óńirderdiń naýqastary tańdaý quqyǵyn paıdalana otyryp, elordada emdelýdi qalaıdy. Búginde Astanada emdelip jatqan árbir besinshi naýqas basqa qaladan kelgen», - delingen habarlamada.
Osy máseleni sheshý úshin densaýlyq saqtaý júıesin damytýdyń 2025 jylǵa deıingi perspektıvalyq jospary bekitilgen. BMSK jelisin damytý tujyrymdamasy tabysty iske asyrylýda. Bul joba «Úıdegi dáriger» dep atalady.
Joba turǵyn úılerdiń birinshi qabattarynda ornalasqan shaǵyn dárigerlik ambýlatorııalar jelisin ashýdy maqsat etken. «Úıdegi dáriger» jobasynyń bir ereksheligi - oǵan arnaıy jer ýchaskesin bólý, klınıkany salý men jabdyqtaýǵa bıýdjetten shyǵyn júmsalmaıdy. Ambýlatorııany ashý jeke ınvestıtsııa esebinen júzege asyrylady. Qarjylyq model qarapaıym. Memleket halyqty tirkeýge kepildik beredi, al tıisinshe jan basyna qarjylandyrý da, óz kezeginde jeke kásipker tujyrymdamada bekitilgen talaptarǵa sáıkes emhananyń qurylysy men jabdyqtalýyna ınvestıtsııa bóledi.
Osylaısha, ózara tıimdi yntymaqtastyqtyń barlyq jaǵdaılary jasalǵan. Memleket bıýdjet qarajaty jáne emhana ashý ýaqytyn únemdeıdi, jańa jumys oryndaryn qurady. Jeke kásipker óz isin ashady. Al halyq sapaly medıtsınalyq kómekke qol jetkizedi. Ótken jyly osyndaı 8 ambýlatorııa ashyldy. Qala qurylysynyń ósý qarqyny men josparlaryn eskere otyryp, ákimdik 2023 jylǵa deıin BMSK jelisin damytý josparyn bekitti. Oǵan sáıkes qosymsha 51 dárigerlik ambýlatorııa ashylatyn bolady.
«Bul halyqtyń densaýlyq saqtaý qyzmetterine degen qajettiligin qamtamasyz etýge múmkindik beredi. Tujyrymdamany iske asyrýdan kútiletin tikeleı nátıje - 15 mlrd teńgeden astam bıýdjet qarajatyn únemdeý. Sondaı-aq, medıtsınalyq kómektiń sapasy arqyly ómir súrý uzaqtyǵyn arttyrý - negizgi maqsattardyń biri», - delingen qalalyq Qoǵamdyq densaýlyq saqtaý basqarmasynyń habarlamasynda.
