Astanada emdelgen naýqastyń aqysyn aýrýhanaǵa sot óndirip berdi
ASTANA. QazAqparat - Astanada naýqas medıtsınalyq qyzmettiń aqysyn tólemeı aýrýhanadan qashyp ketken.
«2015 jyly «№1 qalalyq aýrýhana» MQK men elorda turǵyny arasynda aqyly qyzmet kórsetý jónindegi kelisimshart jasalǵan. Er adam qanaǵattanarlyq jaǵdaıda, turǵylyqty jeri boıynsha dárigerge qaralyp otyrý jóninde keńes berilip aýrýhanadan shyǵarylǵan. Oǵan statsıonarlyq syrqattyń medıtsınalyq kartasynyń úzindisi (aýrý tarıhy) berilgen, onda er adam úzindimen kelisetinin, medıtsınalyq personalǵa shaǵymy joq ekendigin kórsetken», - dep habarlaıdy Astana qalalyq sotynyń baspasóz qyzmeti.
Alaıda er adam úzindini alysymen, medıtsınalyq qyzmettiń aqysyn tólemeı aýrýhanadan ketip qalǵan.
Іstiń materıaldaryn zerdelep shyqqan Astananyń Saryarqa aýdandyq soty «№1 qalalyq aýrýhana» MQK talap-aryzyn qanaǵattandyryp, onyń paıdasyna 295 636 teńgeni óndirdi. Sot sheshimi zańdy kúshine endi.
