Astanada embrıondaǵy patologııany anyqtaıtyn tehnologııa qoldanysqa endi
ASTANA. KAZINFORM – Elordadaǵy reprodýktıvti medıtsına klınıkasynda embrıondaǵy genetıkalyq aýytqýlardy erte kezeńde anyqtaıtyn PGT-A (Next Generation Sequencing) tehnologııasy qoldanysqa engizildi. Bul ádis bolashaq balanyń densaýlyǵyn júktilikke deıin baǵalap, tuqym qýalaıtyn jáne hromosomalyq patologııalardyń aldyn alýǵa múmkindik beredi.
Medıtsınada «altyn standart» sanalatyn bul tehnologııa embrıonnyń barlyq 23 jup hromosomasyn tolyq tekseredi. Sonyń negizinde dárigerler genetıkalyq turǵyda saý embrıondy tańdaı alady.
Reprodýktıvti medıtsına ınstıtýtynyń bólim meńgerýshisi, embrıolog Aldııar Máliktiń aıtýynsha, jańa ádis eń aldymen embrıon kezinde aýyr hromosomalyq aýytqýlardyń bar joǵyn kórsetedi.
– PGT-A EKU arqyly júktilik kezeńinde-aq tuqym qýalaıtyn aýrýlardy kórsete alatyn tehnologııany iske qostyq. Atap aıtqanda, Daýn sındromy (21-hromosomanyń artyq bolýy), Edvards sındromy (18-hromosoma), Pataý sındromy (13-hromosoma), sondaı-aq jynystyq hromosomalarǵa baılanysty patologııalar anyqtalady. Budan bólek, keıbir embrıondarda hromosomanyń jetispeýi nemese artyq bolýy saldarynan júktilik múlde damymaı qalady. Osyndaı qaýipterdiń aldyn alý – tehnologııanyń basty maqsaty, - deıdi maman.
Onyń aıtýynsha, genetıkalyq turǵyda tekserilgen embrıondy kóshirý túsik qaýpin azaıtady.
– Biz úshin mańyzdysy – patsıenttiń tek júkti bolýy emes, júktilikti aman-esen kóterip, deni saý bala dúnıege ákelýi. Sondyqtan PGT-A arqyly patologııasy bar embrıondardy erte kezeńde-aq iriktep alamyz. Mundaı jaǵdaıda deni saý balany dúnıege ákelý yqtımaldylyǵy 60-70 paıyzǵa deıin jetedi, - deıdi Málik Aldııar.
Astana qalasynyń turǵyny Juldyz jańa tehnologııa otbasy úshin kóp kómek bolǵanyn aıtady.
– Alǵashqy EKU sátsiz aıaqtaldy. Keıin memlekettik kvota arqyly qaıta kirdik. Bul joly embrıondardy aldyn ala genetıkalyq turǵyda teksertip qoıdyq. Sonyń arqasynda qaı embrıonnyń saý ekenin bilemiz. Qazir deni saý 6 aılyq balam bar, - deıdi ol.
Aıta keteıik, EKU-dan keıin tabıǵı jolmen bala kótergen ana keńesimen bóliskenin jazǵan edik.