Astanada elordanyń týrıstik klasterin damytý máseleleri talqylandy
ASTANA. QazAqparat - Astanada týrıstik qaýymdastyqtyń qatysýymen dóńgelek ústel ótti. Kezdesýge qatysýshylar Astanadaǵy týrızmniń damýy, qalanyń týrıstik tartymdylyǵynyń deńgeıin arttyrý suraqtaryn talqylady, dep habarlaıdy elorda ákimdiginiń resmı saıty.
Dóńgelek ústelge «Astana Konvenshn Bıýro» JShS, «Týrızm Indýstrııasy Odaǵy» jáne «Arman-tour» týrıstik kompanııasynyń ókilderi qatysty.
Týrızm ındýstrııasynyń odaǵy - 2015 jyly bıznes assotsıatsııasynyń bastamasymen Qazaqstannyń týrıstik ındýstrııasyn damytý salasynda kúsh biriktirý maqsatynda qurylǵan iri týrıstik birlestikter odaǵy.
«Recommendedby EXPO-2017» Astana qalasynyń seriktestigi baǵdarlamasyn daıyndaý jáne iske asyrý aıasynda qonaq úılerge, qoǵamdyq tamaqtaný nysandaryna jáne jolaýshylar tasymaly qyzmetterine biliktilik talaptaryn qurý boıynsha jumys júrgizý usynyldy. Bul EKSPO-2017 bastalǵanǵa deıin týrıstik ınfraqurylymnyń barynsha kóp nysandarynyń daıyndyǵyn jedeldetýge jol ashady.
Sonymen qatar, dóńgelek ústelge qatysýshylar týrızm salasy ókilderi úshin aqparattyq týrlar uıymdastyrý qajettigin de atap ótti.
Dóńgelek ústel qorytyndysy boıynsha Bıýro men Odaq arasynda ózara seriktestik týraly Memorandým jasaý týraly kelisimge qol qoıyldy.
Seriktestik baǵdarlamasyna qonaq úıler, qoǵamdyq tamaqtaný nysandary jáne jolaýshylar tasymaly qyzmetteri qatysady. Baǵdarlamanyń negizgi maqsaty usynylatyn qyzmetterdiń deńgeıin baǵalaý bolyp tabylady. Onyń qorytyndysy boıynsha qyzmet kórsetý salasynyń sýbektilerine Astana qalasynyń seriktesi dárejesi men «Recommendedby EXPO-2017» belgisi beriledi.
Bul baǵdarlama Astana qalasynyń ımıdjin kóterý maqsatynda iske asyrylatyn qyzmetter deńgeıin jetildirip, sapasyn arttyrýǵa múmkindik beredi.
