Astanada elordalyq jastar forýmy ótti
ASTANA. QazAqparat - Nazarbaev ýnıversıtetinde QR Táýelsizdiginiń 25 jyldyǵyna arnalǵan «Jastar. Energııa. Innovatsııalar» atty elordalyq jastar forýmy ótti. Forým aıasynda jas kásipkerler men ǵalymdar ınnovatsııalyq, ǵylymı jáne aqparattyq, sondaı-aq, áleýmettik jáne jastar kásipkerligi jobalaryn usyndy.
Jastar saıasatyn júzege asyrý máselelerin talqylaý úshin 500 astam adam jınaldy. Forýmǵa Astana qalasy ákiminiń orynbasary Ermek Amanshaev, QR Parlamenti Májilisiniń depýtaty Gennadıı Shıpovskıh, qalalyq máslıhat depýtaty Ashat Oralov, «Astana Jastary» resýrstyq ortalyǵynyń basshysy Ánýar Nurpeıisov jáne t.b. qatysty.
«Elordada Táýelsizdigimizdiń 25 jyldyǵy aıasynda osyndaı aýqymdy forýmnyń ótkizilýi biz úshin asa mańyzdy. Astananyń ózindik «gravıtatsııasy» bar, ol talanttardy, jańa jobalardy, qarjylyq, zııatkerlik jáne áleýmettik kapıtaldy ózine tartady. Memleket basshysynyń osy sózderi Astananyń qaıtalanbas atmosferasynyń tereńdigin, erekshe energetıkalyq aýrasyn jetkizedi», - dep atap ótti Astana ákiminiń orynbasary Ermek Amanshaev.
Onyń aıtýynsha, Astanada qolǵa alynǵan jahandyq jobalar, ásirese EKSPO-2017 halyqaralyq mamandandyrylǵan kórmesin ótkizý tehnologııalardy, jańa ekologııalyq óndiristerdi jáne kásipterdi, ınnovatsııalyq ekonomıka men ındýstrıaldy bıznes standarttaryn damytý jolyndaǵy naqty qadamǵa aınalýy kerek.
Forým aıasynda jasyl tehnologııalardy damytý jáne ınnovatsııalardy óndiriste paıdalaný boıynsha jobalar kórmesi uıymdastyryldy, sondaı-aq, tal sabaqtarynan toqylǵan buıymdar jasaý sheberhanasy sııaqty áleýmettik jobalar da tanystyryldy.
«Búginde bizdiń sheberhana halyqtyń áleýmettik osal toptaryn jumysqa ornalastyrady, qazirgi kezde 30 jýyq adam oqytyldy, múgedektigi bar 8 adam jumys istep júr», - dedi Best for kids qoǵamdyq qory janyndaǵy Green Tal áleýmettik jobasynyń jetekshisi Emın Askerov.
Jas kásipker jınalǵan qaýymdy áleýmettik kásipkerlikti belsendi damytýǵa, osylaısha halyqtyń barlyq toptaryna jumys berý múmkindigin usynýǵa shaqyrady.
«Astana Jastary» resýrstyq ortalyǵynyń basshysy Ánýar Nurpeıisov elordada túrli jastar sýbmádenıetiniń ókilderi, talantty jáne kreatıvti turǵyndary tájirıbe almasatyn, sheberlik dáristeri men trenıngter ótkizetin biryńǵaı ortalyq qurýdy usyndy.
Forým sońynda Táýelsizdiktiń 25 jyldyǵyna jáne Rıo-de-Janeırodaǵy Olımpıada jeńimpazdary men júldegerlerine qurmet kórsetýge arnalǵan avtosherý uıymdastyryldy.
