Astanada elordalyq daryndy jýrnalıst-qalamgerlerdi eske alýǵa arnalǵan kesh ótedi
ASTANA. 4 mamyr. QazAqparat - Búgin Astanadaǵy «Jastar» mádenıet saraıynda (saǵat 19.00-de) erekshe shara - elordalyq daryndy jýrnalıst-qalamgerlerdi eske alýǵa arnalǵan kesh uıymdastyrylyp otyr.
Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev irgetasyn qalaǵan jáne sáýletti deńgeıge jetkizgen Astana qalasy kún saıyn qarqyndy damyp, gúldenip keledi. Elordamyzdyń osyndaı bıik dárejege kóterilýine, ósip-órkendeýine tórtinshi bıliktiń ókilderi - jýrnalıster qaýymy da óte zor úles qosýda.
«1998 jyldyń 4 sáýirinde Astana qalasynyń Halyqaralyq baspasóz ortalyǵy quryldy. Osynda bir myńnan astam brıfıngter jáne baspasóz máslıhattary joǵary deńgeıde ótti. Sonyń nátıjesinde jańa elordamyz týraly barlyq gazet-jýrnaldar betterinde tartymdy maqalalar men ocherkter jaryqqa shyqty, teledıdarlar men radıolar arqyly myńdaǵan beıne jáne aýdıo sıýjetter búkil jersharyna taratyldy. Halyqaralyq baspasóz ortalyǵynyń osy úlken jeńisine ómirden erte ótken, daryndy qalamger-jýrnalıster óz úlesterin molynan qosyp, el esinde qaldy. Olardyń arasynda Aqseleý Seıdimbek, Dúkesh Báıimbetov, Vladımır Kochenov, Jomart Ábdihalyq, Rafael Jumabaev, Talǵat Іlimjan, Vladımır Boıko, Jumataı Sabyrjanuly, Shákızada Quttaıaqov, Almas Joltaev, Madrıd Rysbekov, Nógerbek Maǵzumov, Oktıabr Álibek, Oleg Kvıatkovskıı, Birjan Belǵara jáne basqalar bar»,- deıdi atalǵan sharanyń uıymdastyrýshylarynyń biri, jýrnalıst Sádibek Túgel.
Bul keshte ómirden erte ótken daryndy jýrnalıst-qalamgerlerge arnalǵan beıne-sıýjetter kórsetilip, Astana qalasy Mádenıet departamentiniń tematıkalyq ulaǵatty kontserti qoıylady. Kontsertke esimderi elimizge belgili elordamyzdyń óner juldyzdary qatysady. Olardyń ishinde Álem ártisi Aıman Musaqojaeva, tanymal ánshiler Mádına Sádýaqasova, Bekbolat Baısaǵatov, Serik Ospanov, Seken Turysbekov, Estaı Muqashev jáne basqalar bar.
Bul keshtiń bastamashylary ári negizgi uıymdastyrýshylary - «Uly Dala Qyrandary» áleýmettik-mádenı respýblıkalyq qozǵalysy.
Keshtiń ótýine Astana qalasynyń ákimdigi, Astana qalasy Mádenıet departamenti, «Jastar» mádenıet saraıynyń ákimshiligi, L.N.Gýmılev atyndaǵy Eýrazııa ulttyq ýnıversıtetiniń telestýdııasy jáne basqa ujymdar qoldaý kórsetken.
