Astanada elorda kúnine arnalǵan merekelik sharalar bastaldy
ASTANA. QazAqparat - Búginnen bastap Astanada qala kúnine oraılastyrylǵan merekelik sharalar ótkizile bastaıdy, dep habarlaıdy astana.kz.
Atap aıtqanda, búgin «Sahnadan sálem!» halyqaralyq teatr festıvali bastalady. Festıval maýsymnyń 28-ine deıin jalǵaspaq. Búgin tanymal reseılik ártis Sergeı Bezrýkovtyń qatysýymen «Sırano de Berjerak» qoıylymy kópshilik nazaryna usynylady. Sonymen qatar «Saryarqa» aýdanynyń ákimdigi apta boıy aýlalar arasynda buqaralyq sport túrlerinen jarystar ótkizedi. Maýsymnyń 26-sy kúni Astanada alǵash ret halyqaralyq jaýyngerlik óner festıvali ótedi. Sharaǵa qazaqstandyqtardan bólek, AQSh, Qytaı, Reseı, Chehııa, Ońtústik Koreıa jáne Japonııanyń osy ónerdegi has sheberleri, úzdik belbeýler men dan ıeleri jınalmaq. Baǵdarlamaǵa aıkıdo, djıý-djıtsý, kapoeıra, býdzınkan, taı boksy, godzıý-rıý karate, shın kalı, kendo, taekvondo, vın-chýn, shaolın jáne qoıan-qoltyq jekpe-jek sııaqty 12 sport túri engizilgen.
Elordada tuńǵysh ret ótetin festıvaldiń qurmetti qonaqtary - Gollıvýd juldyzy, aıkıdo-aıkıkaıdyń jetinshi dan ıegeri Stıven Sıgal, akter, kásibı sportshy, «Strana boksa», «Strana geroev» telejobalarynyń júrgizýshisi, jaýyngerlik jekpe-jekterdiń áskerı nusqaýshysy bolǵan Sergeı Badıýk, reseılik kıkbokser, kásibıler arasyndaǵy birneshe dúrkin jáne qazirgi álem chempıony Batý Hasıkov. Sonymen qatar maýsymnyń 28-i kúni «Qazaqstan» ortalyq kontsert zalynda «Naz» memlekettik bı teatrynyń 15 jyldyǵyna oraılastyrylǵan kontsert ótedi. Ónerpazdar qazaq halqynyń salt-dástúri, ádet-ǵurpy men tarıhyn kórermenderge san salaly bı tilimen kórsetpek. Ónersúıer qaýymǵa Qazaqstan men shet memleketterdiń úzdik baletmeısterleri daıyndaǵan jańa repertýar usynylady. Kontsertte Tamara Asar, Ardaq Balajanova, Aıgúl Imanbaeva, Janar Aıjanova, Marjan Arapbaeva syndy estrada juldyzdary men «Jastar» teatry, «Paı-paı» etnoaspaptyq toby óner kórsetedi. Elorda kúnine oraılastyrylǵan mádenı sharalarmen astanaday.kz saıtynda tanysýǵa bolady.
