Astanada «Elimniń taǵdyry - meniń taǵdyrym!» forýmy ótti
ASTANA. 3 shilde. QazAqparat - Búgin Astanadaǵy Nazarbaev ortalyǵynda «Elimniń taǵdyry - meniń taǵdyrym!» atty I respýblıkalyq forým ótti.
Forýmǵa óz taǵdyryn el taǵdyrymen baılanystyryp, «Elim, jerim!» dep eńbek etken azamattar shaqyryldy. Olardyń ishinde kórnekti qoǵam qaıratkerleri, áskerıler, ustazdar, ánshiler, mashınıster, sportshylar men stýdent-jastar bar. «Forýmǵa «Elimniń taǵdyry - meniń taǵdyrym!» dep ataý árbir qazaqstandyqtyń óz Otanyna degen sezimin aıqyn kórsetse kerek. Onyń ishinde bári bar - Táýelsiz 20 jyldyń ishinde myń qubylyp turǵan álemde Qazaqstannyń nyq qadam basyp, qazirgi jetistikterge jetýi, al, eń bastysy, qarapaıym halyqtyń eren eńbegi. Sol sebepti biz osy urandy forýmnyń negizgi taqyryby retinde alyp otyrmyz», - dep atap kórsetti forýmnyń ashylý rásiminde Nazarbaev ortalyǵynyń dırektory Qanat Saýdabaev.
Forýmnyń bul ereksheligi is-sharany ótkizý barysynan da barynsha baıqalady. Sahna tórinde resmı tulǵalar ǵana emes, qarapaıym halyqtyń ókilderi - mashınıst-konstrýktor, ánshi-ustaz, fermer, dáriger, alpınıst pen áskerı azamattar bas qosyp, el taǵdyrymen bite qaınasqan óz taǵdyrlarynan syr shertti.
