Astanada elimizdiń úzdik JOO oqytýshylary marapattaldy
ASTANA. QazAqparat - Astanada 2018 jylǵy «Joǵary oqý ornynyń úzdik oqytýshysy» ataǵynyń ıegerleri marapattaldy, dep habarlaıdy QazAqparat QR Bilim jáne ǵylym mınıstrliginiń baspasóz qyzmetine silteme jasap.
Jeńimpaz atanǵan 200 oqytýshyǵa 200 AEK kóleminde (1 AEK - 2525 teńge) grant berildi.
QR BǴM baspasóz qyzmetiniń habarlaýynsha, atalǵan grant oqytýshylarǵa ǵylymı-zertteý jumystaryn júrgizýge, ǵylymı jınaqtar shyǵarýǵa jáne biliktilikterin arttyrý úshin álemniń jetekshi ýnıversıtetterinde taǵylymdamadan ótýge múmkindik beredi.
Marapattaý rásimine qatysqan QR Bilim jáne ǵylym vıtse-mınıstri Talǵat Eshenqulov mınıstr Kúlásh Shámshıdınovanyń quttyqtaý hatyn oqyp berdi.
«Qurmetti áriptester! Bizdiń memleketke jastardy sapaly oqytatyn, zamanaýı ómirde ıkemdi, utqyr ári jańa ekonomıkalyq jaǵdaılarǵa beıimdelý qabiletin beretin bilim júıesi kerek. Memleket basshysy 2018 jyldyń 5 qazanyndaǵy Halyqqa arnalǵan Joldaýynda bilim berýdiń joǵary sapasymen qamý týraly tapsyrma berdi. Álemniń úzdik ýnıversıtetterimen yntymaqtastyqty damytý da mańyzdy. Bul mindetterdi júzege asyrý, qurmetti áriptester, Sizderge tikeleı baılanysty. Sondyqtan, bizdi úlken jumystar kútip tur. Qurmetti grant ıegerleri! Búgin Sizder «Joǵary oqý ornynyń úzdik oqytýshysy» ataǵyn jeńip aldyńyzdar. Bıyl Sizderge oıda júrgen josparlardy júzege asyratyn tamasha múmkindik berilip otyr. Sizderdiń eńbekterińizdiń nátıjesi otandyq bilim men ǵylym júıesin damytýǵa qosqan eleýli úles bolaryna senimdimin.», - dep jazylǵan Bilim jáne ǵylym mınıstriniń quttyqtaý hatynda. 
Aıta keteıik, jyl saıyn ótkiziletin «Joǵary oqý ornynyń úzdik oqytýshysy» baıqaýyna bıyl respýblıkamyzdyń 80 joǵary oqý ornynan 481 úmitker qatysty.
Baıqaý qatysýshylarynyń ǵylymı-pedagogıkalyq qyzmeti sapalyq jáne sandyq kórsetkishteri boıynsha baǵalanǵan. Onyń ishinde, oqýlyqtardy, monografııalardy, oqý quraldaryn aǵylshyn tilinde ázirleý jáne basyp shyǵarý; kásibı qyzmeti boıynsha shet tilindegi ashyq onlaın kýrstan tabysty ótkeni týraly sertıfıkattyń bolýy jáne ózge de talaptar bar.
Nátıjesinde elimizdiń 43 joǵary oqý ornynan 200 maman «Joǵary oqý ornynyń úzdik oqytýshysy» ataǵynyń ıegeri boldy. Onyń ishinde 36 ǵylym doktory, 133 ǵylym kandıdaty, 29 PhD doktory jáne 2 magıstrant bar.
