Astanada elimizdiń kıeli jerlerine arnalǵan kórme ashyldy
ASTANA. QazAqparat - Búgin Astanada Eýropalyq art rezıdentsııasy jobasynyń aıasynda «Ghost Expedition» kórmesi ashyldy, dep habarlaıdy QazAqparat tilshisi.
Kórmede Polsha, Shveıtsarııa jáne Qazaqstan sýretshileriniń elimizdiń kıeli jerlerine jasaǵan ekspedıtsııasynyń nátıjesi boıynsha dalalyq zertteýleri usynyldy.
Munda 6 sýretshi - Gregor Vogel (Shveıtsarııa), Marek Mardosovıch (Polsha), Gregorch Demzýk (Polsha), Nazıra Karımova (Qazaqstan), Arman Saın (Qazaqstan), Ánýar Músirepovtiń (Qazaqstan). jumystary qoıylǵan
«Búgingi joba Eýropa mádenıetiniń murasy jyly jáne Eýroodaq pen Qazaqstannyń 25 jyldyq dıplomatııalyq qarym-qatynasy aıasynda uıymdastyryldy. Kórmege úsh memleket sýretshileriniń Qazaqstannyń kıeli jerlerine arnaıy jasalǵan ekspedıtsııanyń nátıjesindegi jumystary qoıyldy. Kórmede putqa tabyný mádenıetiniń kóne eskertkishteri, erekshe kúsh oryndary, paleolıt dáýiriniń nekropolderi, ortaǵasyrlyq ıslam mazarlary jáne biregeı tabıǵat qubylystary óner jáne tehnologııa arqyly jandanady. Aıtýly sharany uıymdastyrýǵa atsalysqan barlyq azamattarǵa jáne arnaıy shyǵarmashylyq eńbekteri úshin sýretshilerge alǵysymdy bildiremin»,- dedi Eýroodaqtyń Qazaqstandaǵy ókildiginiń basshysy Sven-Olov Karlsson.
Kórkemdik zertteý obektisi bolyp tańdalǵan óńirlerdiń biri - Mańǵystaý. Ejelgi kóshpendiler turaǵynda paleolıt dáýiriniń sansyz eskertkishteri, ejelgi qabirler, kıeli jerler men 362-den astam áýlıeniń qorymdary saqtalǵan. Ǵalymdardyń paıymdaýynsha, Mańǵystaý ejelgi muhıttyń túbi bolǵan jerde ornalasqan. Sonymen qatar, bul óńirde qazaqstandyq munaıdyń tórtten bir bóligi óndiriledi.
«Installıatsııalardy jasaý úshin sýretshiler Altynemel ulttyq saıabaǵy men Mańǵystaýdyń kıeli jerlerimen tanysyp, zerttep shyqty. Ár jumysty jasaýǵa shamamen 1 aptadan astam ýaqyt ketti. Eýropalyq sýretshiler elimizdiń qasıetti jerleriniń tunyp turǵan tarıhyn buzbaı zamanaýı qalypqa keltirip, kórermenderge usyna bildi dep oılaımyn. Bul degenimiz, tiri tarıhty, máńgilik ónerge aınaldyrýmen birdeı», - dedi sýretshi ári kórmeniń kýratory Ánýar Músirepov.
Kelesi baǵytynda sýretshiler Almaty qalasynyń mańynda ornalasqan «Altyn Emel» ulttyq qoryǵyna saıahat jasady. Basty nazar Ánshiqum tóbesine aýdaryldy. Bul tabıǵat fenomeni qurǵaq aýa raıynda qumnyń qozǵalysy áserinen án yrǵaǵyna uqsas únniń estilýimen belgili.
Ejelgi zamannan beri ánshi qumnyń úni kóptegen ańyzdardyń týyndaýyna sebep boldy. Keıbir halyq ańyzdaryna súıensek, bul qum astynda jatqan qala qońyraýlarynyń úni, basqa aqparatqa sáıkes, halyq folklory osy jerde Shyńǵys hannyń zıraty ornalasqan, al ún onyń jan azaptaryn beıneleıdi dep senedi.
Atalmysh kórme Mańǵystaý oblysy ákimdigi jáne Qazaqstandaǵy Shveıtsarııa elshiligimen birlesip Qazaqstandaǵy Eýropalyq odaq ókildigimen «Astana Art Show» zamanaýı óner festıvali aıasynda uıymdastyryldy.
Aıta keteıik, budan buryn Astana bir aı boıy qazirgi zamanǵy óner ortalyǵyna aınalatyndyǵyn, elordada shetelde turatyn qazaqstandyq sýretshilerdiń kórmesi ótetinin habarlaǵan bolatynbyz.
