Astanada elimizdegi eń iri týberkýlezge qarsy dıspanserdiń qurylysy aıaqtaldy
ASTANA. QazAqparat - Astanada Qazaqstandaǵy jáne TMD memleketterindegi iri týberkýlezge qarsy dıspanserdiń qurylysy aıaqtaldy. Bul týraly qala ákimdiginiń saıty habarlady.
Іri medıtsınalyq mekeme Temrijol kentinde qyrqynshy stansaǵa jaqyn ornalasqan. Onyń qurylysy 2008 jyly bastalǵan.
Elorda ákimi Áset Isekeshev Memleket basshysynyń tapsyrmasymen jáne Dúnıejúzilik densaýlyq saqtaý uıymynyń standarttaryna sáıkes salynǵan emdeý mekemesinde boldy.
Jańa keshen tórt emdeý korpýsynan turady: klınıkalyq-dıagnostıkalyq zerthana, bakterıologııalyq, tamaqtaný blogy, kir jýatyn oryn. Aýrýhana zamanaýı qural-jabdyqtarmen jaraqtalǵan, sonyń ishinde: kompıýterlik tomografııa, rentgen, sheteldik jáne jergilikti dárigerlermen konsılıým qurýǵa, onlaın translıatsııa júrgizýge múmkindik beretin beıneqondyrǵysy bar kompıýterlik operatsııalyq bólmesi bar. Taǵy bir artyqshylyq - 12 tósek orynǵa eseptelgen reanımatsııalyq bólimshe, bul elimizde jumys isteıtin dıspanserlerdiń ishindegi eń úlken bólimshe sanalady. Sondaı-aq, naýqastardy bólek ornalastyratyn palatalar bar. Keshen 500 naýqasty qabyldaı alady, olarǵa 100 úzdik maman qyzmet kórsetedi.
Atap óterligi, statıstıkaǵa sáıkes, Astanada týberkýlezben aýyratyndar sany tórt ese azaıǵan. 2008 jyly 218 naýqas bolsa, búgingi kúni naýqastar sany - 58 adam.
Dıspanserdi aralaý barysynda Áset Isekeshev qysqa merzimniń ishinde iske qosý-jolǵa qoıý jumystaryn aıaqtaýdy, abattandyrý jáne kólik qatynasy máselelerin pysyqtaýdy tapsyrdy.
