Astanada elimizdegi alǵashqy Aqparattyń shynaıylyǵyn baǵalaý ortalyǵy ashyldy
ASTANA. 11 tamyz. QazAqparat - Astanalyqtar bir-birin jalǵandyq detektorymen teksere alady. Osy aptada, elordada Aqparattyń shynaıylyǵyn baǵalaý ortalyǵy ashyldy. Mekeme polıgraftyń «Dıana» serııasyndaǵy sońǵy úlgisimen jabdyqtalǵan. Ortalyqtyń qyzmetine kóbine zańdy jáne jeke tulǵalar, memlekettik qurylymdar júginedi.
Eńlik Dúısenǵalıeva, Aqparattyń shynaıylyǵyn baǵalaý ortalyǵynyń dırektory:
«Ortalyq kadrlardy irikteý, qyzmetkerlerdi attestattaý jáne skrınıng qyzmetterin usynady. Mysaly, bul adamdardyń jumysqa degen nıeti qandaı, jumys istegisi kele me, joq pa? Oǵan jumys kerek pe? Sáıkesinshe, polıgrafologtardy oqytamyz. Sondaı-aq, tıisti qondyrǵylar satylady, tolyq tehnıkalyq súıemeldeý, kepildi jáne kepilden keıingi qyzmetter kórsetiledi».
Ortalyq kóshpeli jáne statsıonar kabınettermen jabdyqtalǵan. Sońǵysynda beınekameralar ornatylǵan. Bir kamera adamnyń boıyn túsirse, ekinshisi - mımıkalyq qozǵalystaryn túsiredi. Al arnaıy tekserý kreslosy jańa quraldarmen jabdyqtalǵan. Oǵan qan tamyrynyń soǵýyn, adamnyń mımıkasyn jáne qozǵalysyn tirkeıtin 7 tetik qosylǵan.
«Polıgraf emotsııany tekserip, bárin tolyq jazady: kózdiń qozǵalysynan bastap, arterıaldyq qysymyn ólsheýdi, adam qozǵalyp, onyń tynys alýy ózgergenge deıingi qysymyn ólsheıdi. Sondyqtan polıgrafty aldaý múmkin emes", - deıdi E. Dúısenǵalıeva.
Sonymen qatar, ortalyqta 20 adamǵa arnalǵan oqý synyby ashyldy. Munda bilim alyp, testileý barysyn baqylaýǵa bolady. Barlyq úsh kabınet ózara beınekameralarmen, dybystyq qondyrǵylarmen jáne baqylaý tehnıkasymen baılanysqan.
