Astanada elektrondy jolaqy tóleý júıesi 30 shildeden bastap iske qosylady
ASTANA. QazAqparat - Astanada Astra Plat elektrondy jolaqy tóleý júıesi 30 shildeden bastap iske qosylady. Qazirgi kezde jeńildikti jáne oqýshylarǵa arnalǵan kólik kartalary tegin taratylyp jatyr, dep habarlaıdy qalanyń resmı saıty.
«Astana LRT» JShS tólem júıeleri ortalyǵynyń málimetinshe, búginde 44 myńnan artyq jeńildikti jáne 68 myńnan astam oqýshylarǵa arnalǵan kólik kartasy berildi. Elektrondy jolaqy tóleý júıesi engiziletin kezeńde 1 maýsym - 31 tamyz aralyǵynda 7-den 15 jasqa deıingi balalar qalalyq jáne ekspress-marshrýttarda tegin jol júredi. Bul úshin ár bala avtobýsta ataýly kólik kartasyn nemese oqý ornynan berilgen anyqtamany (fotosýreti bar) kórsetýge tıis.
Qoldanystaǵy zańnamanyń talabyna sáıkes qala mańyndaǵy avtobýstarda jol júrý barlyq azamattar, sonyń ishinde azamattardyń jeńildikti sanatyna jatatyndar úshin de aqyly bolyp tabylady. 7-den 15 jasqa deıingi balalar úshin jolaqynyń 50% tólenedi.
Qala mańyna qatynaıtyn jolaýshylarǵa yńǵaıly bolýy úshin kólik aımaqtaryna bólingen tarıftik jeli engiziledi. Mundaı ýnıfıkatsııa tarıfter túrin 25-ten 5-ke deıin qysqartýǵa, sondaı-aq eldi mekender úshin jolaqy qunyn 97%-ǵa, orta eseppen 44,5 teńgege tómendetýge múmkindik beredi.
Sonymen qatar, kólik kartalaryn satý men tolyqtyrý jelilerin uıymdastyrý boıynsha jumystar júrgizilip jatyr. Qala mańyndaǵy aýyldardyń turǵyndary kólik kartalaryn avtobýs salonynda tikeleı júrgizýshiden satyp alyp, tolyqtyra alady. Kólik kartasy bolmaǵan jaǵdaıda, jolaýshy jolaqysyn júrgizýshige nemese kondýktorǵa qolma-qol aqshamen tólep, belgilengen úlgidegi (QR-kodpen) bir rettik qaǵaz bılet alýǵa quqyly.
Ataýly kólik kartalaryn paıdalanatyn jolaýshylar basqa da artyqshylyqtarǵa ıe. Olar qala mańyna qatynaıtyn avtobýstardan qalalyq jáne ekspress marshrýttarǵa tegin aýysyp otyra alady. Bul rette jolaýshy qala mańyna qatynaıtyn avtobýstan shyǵa beriste kólik kartasyn termınalǵa qoıýy kerek. Sodan keıin keıin 60 mınýttyń ishinde ekspress marshrýtqa nemese qalalyq avtobýsqa otyrady.
Zańnama talaptaryna sáıkes, tegin jol júrý quqyǵy Astana qalasynda turatyn azamattardyń jeńildikti sanatyna jatatyn tulǵalarǵa beriledi. Alaıda, búginde atalǵan jeńildikterdi barsha respýblıkamyzdyń halqy paıdalanyp júr. Zańnamamen sáıkestendirý úshin Aqmola oblysynyń ákimdigi Astana qalasynyń mańyndaǵy eldi mekenderde turyp jatqan azamattardyń jeńildikti sanatyna jatatyn tulǵalardyń jol júrýin qarjylandyrý máselesin qarýy kerek.
