Astanada elektrondy densaýlyq pasporttaryn engizý josparlanýda

ASTANA. QazAqparat - Elorda ákimdiginiń ǵımaratynda «Belsendi azamat» aktsııasy aıasyndaǵy sońǵy brıfıng ótti. Shara barysynda densaýlyq saqtaý, bilim jáne jumysqa ornalasý sııaqty ózekti máseleler talqylandy. Qalalyq basqarmalardyń ókilderi atqarylǵan jumystarǵa toqtalyp, aldaǵy ýaqytta oryn alatyn ózgerister týraly aıtyp berdi, dep habarlady Astana ákiminiń baspasóz qyzmeti.

Densaýlyq saqtaý salasynda dári-dármekter baǵasynyń ósýi, emhanalardaǵy kezekter men jedel járdemniń kelýin uzaq kútý jaǵdaılary qala turǵyndaryn alańdatyp otyr. Bul týraly Astana qalasynyń Densaýlyq saqtaý basqarmasy basshysynyń orynbasary Ivan Lı tolyǵyraq aıtyp berdi.

- Ótken jyly QR Densaýlyq saqtaý mınıstrligi, dári-dármekter jetkizýshiler men ákimdik arasynda jasalǵan memorandýmǵa sáıkes ómirlik mańyzy bar 200 preparattyń baǵasyn ustap qaldyq. Búginde jańa qujatqa qol qoımaqpyz, bul rette belgili bir qıyndyqtar týyndap tur. Dollardyń turaqsyzdyǵynan farmatsevtıkalyq naryqta baǵa saıasaty anyqtalmaǵan. Adamdarǵa endokrındik aýrýlar, qant dıabeti, búırek jetispeýshiligi jáne t.b. aýrýlar kezinde berilip kelgen preparattar burynǵydaı beriledi dep naqty aıta almaımyn. Esesine, buǵan deıin tegin alýǵa bolatyn dárilik zattardyń barlyq kepildendirilgen kólemi qalanyń birneshe dárihanasynda ǵana bolǵan, al endi adamdar ony kez kelgen dárihanadan ala alady, - dedi I. Lı.

Qalalyq emhanalardaǵy kezekti azaıtý úshin jańa ambýlatorııalyq-emhana deńgeıindegi jańa mekemelerdi salýdan basqa, qalalyq emhanalarda navıgatsııa júıesi, ıaǵnı balalarǵa, qarttarǵa jáne azamattardyń basqa da sanattaryna arnalǵan arnaıy dálizder engizilýde. Júkti áıelder úshin bólek dáliz qarastyrylǵan, turǵyndarǵa yńǵaıly bolýy úshin dárigerlerdiń qabyldaý ýaqyty ońtaılandyrylyp, saraptamalar tapsyrý ýaqyty arttyryldy.

Jedel medıtsınalyq járdem stantsııasyndaǵy jaǵdaı da jaqsardy. Qyzmetkerlerge áleýmettik kómek kórsetildi. Dárigerler táýlik boıy jumys isteı alatyndaı balabaqshadan 94 oryn bólindi, onyń ústine qyzmettik baspana usynylady. Jedel járdem mashınalarynyń jetispeýshiligi máselesi ǵana qalyp otyr.

- Kelip túsken shaqyrýlardyń 30% ǵana jedeldilikti qajet etedi. Ol úshin arnaıy sanıtarlyq kólik kerek. Al temperatýrany túsirý nemese qysymdy ólsheý úshin feldsher jaı mashınamen de bara alady. 2 naýryzdan bastap jańa joba qolǵa alynbaq, onyń aıasynda jedel járdem qyzmetine brıgadalardy shaqyrýlar boıynsha aparatyn 25 jeti oryndyq mashına-taksı beriledi, - dedi Ivan Lı.

Onyń aıtýynsha, ústimizdegi jyly iske qosylatyn eń mańyzdy joba elektrondy densaýlyq saqtaý tólqujatyn engizý bolyp tabylady. Onda adamnyń týǵanynan qartaıǵan shaǵyna deıingi aqparat saqtalmaq. Qurylǵylardaǵy barlyq aqparattar qupııa bolady, dárigerler ený kody bolǵanda ǵana elektrondy kartaǵa ózgerister engize alady.