Astanada elektrondyq júıe kommýnaldyq qyzmettiń janarmaı shyǵynyn azaıtty
ASTANA. KAZINFORM — Elordada «Astana Tazalyq» JShS uıymdastyrǵan press-týr ótip, kásiporyn qysqy maýsymdaǵy jumystardyń qorytyndysyn shyǵardy. Іs-sharada tsıfrlyq transformatsııa jetistikteri tanystyrylyp, qyzmetkerlerdi áleýmettik qoldaý sharalary jarııalandy.
Kásiporynnyń baspasóz qyzmetiniń málimetinshe, qys mezgiliniń bastalýynan kommýnalshylar 2,2 mln tekshe metrden astam qar shyǵarǵan. Sondaı-aq, kún saıyn qala kóshelerin tazalaýǵa 600-den astam arnaıy tehnıka men 750-den asa jol jumysshysy jumyldyryldy.
Kásiporynnyń bas dırektory Zamır Saǵınovtyń aıtýynsha, qalyptasqan jumys júıesi kúrdeli aýa raıy jaǵdaıynda da kóshelerdi úzdiksiz tazalaýdy qamtamasyz etýge múmkindik bergen.
Ótken jylmen salystyrǵanda tehnıkalar parki edáýir jańartylyp, marshrýttar sany artty, jaıaý júrginshiler aımaqtaryndaǵy jumystar kúsheıtildi. Qazir kásiporyn kóktemgi-jazǵy rejımge kóshti. Sýarý-jýý mashınalary, vakýýmdyq tehnıkalar men arnaıy jabdyqtar daıyndalyp, bekitilgen kestege sáıkes kóshelerdi jýý, aıaldamalar men trotýarlardy tazalaý, qoqys shyǵarý jumystary júrgizilýde. Kún saıyn bul jumystarǵa 600-ge deıin qyzmetker tartylady.
Shara barysynda kásiporynnyń tsıfrlyq sheshimderine de erekshe nazar aýdaryldy.
— Búginde «Astana Tazalyqtyń» tájirıbesi elimizdiń óńirlerinde ǵana emes, shet memleketter de qyzyǵýshylyq týdyrǵan. Sonyń ishinde elektrondyq jol paraǵy júıesi basty nazarda. Bul júıe arnaıy tehnıkanyń jumysyn naqty ýaqyt rejıminde tolyq baqylaýǵa múmkindik beredi — qozǵalys baǵyttarynan bastap oryndalǵan jumys kólemi men materıal shyǵynyna deıin qamtıdy. Qazir júıe júzdegen tehnıkaǵa engizilip, tıimdiligin kórsetýde: jol paraǵyn rásimdeý ýaqyty 10 mınýttan 1 mınýtqa deıin qysqarǵan, tsıfrlyq baqylaý arqyly janarmaı shyǵyny 10%-ǵa deıin únemdelýde, óndiristik úderisterdiń ashyqtyǵy qamtamasyz etilgen, — deıdi mekeme mamandary.
Budan bólek, kásiporyn qyzmetkerlerin áleýmettik qoldaý sharalary da tanystyryldy. Atap aıtqanda, 7 qyzmetkerge ekinshi deńgeıli bankter arqyly ıpoteka rásimdeý kezinde bastapqy jarnanyń 50%-yn óteýge arnalǵan sertıfıkattar tabystaldy.
Buǵan deıin de kásiporyn birqatar áleýmettik bastamany júzege asyrǵan. Ótken jyly jol jumysshylaryna arnalǵan turmystyq úı-jaılar tolyq jańartylyp, zamanaýı demalys bólmelerimen qamtamasyz etildi. Joba Astana qalasy ákimdiginiń qoldaýymen iske asyrylyp, Esil jáne Nura aýdandarynda jalpy aýdany shamamen 1000 sharshy metrdi quraıtyn 10 nysan jańǵyrtyldy. Sonymen qatar, qyzmetkerlerge arnalǵan 17 páter (bir jáne eki bólmeli) jáne 80 oryndyq jataqhana paıdalanýǵa berildi.
Osydan buryn «Astana Tazalyq» qyzmetkerleri qalalyq jumysshy mamandyqtar baıqaýynda top jarǵanyn jazǵan bolatynbyz.
