Astanada elektr jelilerin jańǵyrtýǵa 8,5 mlrd teńge ınvestıtsııa baǵyttaldy
ASTANA. KAZINFORM — Elordanyń energetıkalyq ınfraqurylymyn jańǵyrtý jumystary qarqyn alyp keledi. Búgin ótken baspasóz týry barysynda jýrnalısterge elektr jelilerindegi birqatar nysanda júrgizilip jatqan jumystar kórsetildi.
Bıylǵy ınvestıtsııalyq baǵdarlama aıasynda qurylys-montaj jumystarynyń 75%-y oryndalǵan.
Qarajattyń negizgi bóligi elektr jelilerin jańǵyrtýǵa, eskirgen jabdyqtardy aýystyrýǵa jáne jeliniń turaqty jumysyn qamtamasyz etýge baǵyttalǵan.
Sharada «Zapadnaıa» qosalqy stantsııasy men «Energotsentr-1» taratý pýnktindegi jumystar tanystyryldy.
«Zapadnaıa» qosalqy stantsııasyn jańǵyrtý jobasynyń ekinshi kezeńine 2,483 mlrd teńge bólingen.
Jumys elektr jelisindegi kerneýdi turaqtandyryp, elordany elektr energııasymen qamtý senimdiligin arttyrýǵa baǵyttaldy.
Al jobanyń alǵashqy kezeńi byltyr júzege asyrylyp, oǵan 118,87 mln teńge jumsalǵan.
Mamandardyń aıtýynsha, mundaı jobalar elektr jelilerindegi aqaýlardyń aldyn alyp, tutynýshylardy turaqty energııamen qamtamasyz etýge múmkindik beredi.
Al «Energotsentr-1» taratý pýnkti 1997 jyldan beri jumys istep keledi. Nysandaǵy keıbir jabdyqtardyń tozýyna baılanysty ony jańǵyrtý jumystary júrgizilip jatyr. Jobaǵa bıyl 648,877 mln teńge qarastyryldy.
Bul nysan arqyly elektr energııasyn alatyn tutynýshylar qatarynda Astana qalasynyń ákimdigi, Memlekettik basqarý akademııasy jáne Qorǵanys mınıstrligi bar.
Jańǵyrtý barysynda otandyq óndiristiń jabdyqtaryna basymdyq berilgen.
— «Energotsentr-1» taratý pýnktin rekonstrýktsııalaý kezinde otandyq óndiristiń jabdyqtary qoldanylyp jatyr. Máselen, vakýýmdy ajyratqyshty Astanadaǵy elektr tehnıkalyq zaýyty jetkizdi. Qalǵan jabdyqtardyń basym bóligi Almatydaǵy Alageum Electric zaýytynan alynǵan. Jabdyqtardy tańdaǵanda otandyq óndirýshilerdi barynsha qoldaýǵa tyrysamyz, — dedi «Astana — AEK» AQ damý jónindegi atqarýshy dırektory Qýandyq Erjanov.
Ótken jyly «Astana — AEK» AQ-nyń ınvestıtsııalyq baǵdarlamasyna 6,661 mlrd teńge bekitilip, naqty oryndalǵan kólem 6,792 mlrd teńgeni qurady.
Qarajat eskirgen jabdyqtardy aýystyrýǵa, elektr jelilerin damytýǵa jáne olardyń jumysyn avtomattandyrýǵa baǵyttaldy.
Aıta keteıik, buǵan deıin Qazaqstan Respýblıkasy biryńǵaı elektr energetıkalyq júıesiniń ońtústik aımaǵynda oryn alǵan tehnologııalyq aqaýlardyń sebebin tergep-tekserý jónindegi memlekettik komıssııa energııamen jabdyqtaýdyń senimdiligin arttyrý jónindegi sharalardy qarady.
