Astanada elektr samokattarǵa baqylaý kúsheıedi: jyl basynan beri 45 jol apaty tirkeldi
ASTANA. KAZINFORM — Astanada elektr samokattardy paıdalaný qarqyny ósken. Qazirgi tańda olardyń jalpy sany 10 myńnan assa, shamamen 8 myńy belsendi túrde qoldanady. Sonymen qatar elektr samokattardyń qatysýymen bolatyn jol-kólik oqıǵalary men quqyq buzýshylyqtar sanynyń ósýi baıqalady. Bul týraly Astana qalasynyń ákimdigi málim etti.
Astana qalasy Polıtsııa departamentiniń málimetinshe, 2026 jyldyń basynan beri qalada 294 jol-kólik oqıǵasy tirkelip, 4 adam qaza taýyp, 373 adam jaraqat alǵan. Onyń ishinde elektr samokattardyń qatysýymen 45 jol-kólik oqıǵasy oryn alyp, 50 adam zardap shekken. Qaza bolǵandar tirkelmegen.
Kommýnıkatsııalar qyzmetinde ótken brıfıngte Astana qalasy Polıtsııa departamentiniń mamandary elektrsamokat paıdalanýshylar tarapynan jıi kezdesetin quqyqbuzýshylyqtardy atap ótti. Atap aıtqanda, bir samokata eki adam bolyp júrý, jaıaý júrginshiler ótkelinen túspeı ótý, sondaı-aq kámeletke tolmaǵandardyń elektrsamokattardy paıdalanýy. Atalǵan zań buzýshylyqtar jol qozǵalysy qaýipsizdigine qaýiptóndirip, jol-kólik oqıǵalarynyń oryn alýyna yqpal etedi.
— 2023 jyly engizilgen ózgeristerge sáıkes, elektrsamokattar shaǵyn elektrkólik quraldary sanatyna jatqyzylyp, jol qozǵalysynyń tolyqqandy qatysýshylary retinde tanylǵan. Ony basqaratyn tulǵalarǵa QR «Jol qozǵalysy týraly» Zańyna sáıkes, jol qozǵalysy qaǵıdalarynyń talaptary tolyq kólemde qoldanylady jáne olardy buzǵany úshin ákimshilik jaýaptylyq kózdelgen, — dep habarlady ákimdikten.
Elektr samokattardy paıdalaný mindetti talaptardy saqtaý qajet. Atap aıtqanda, júrgizýshilerge qorǵanysh shlemin kııý jáne qarańǵy ýaqytta jaryq qaıtaratyn elementterdi paıdalaný mindetteledi. Bul talaptardy saqtamaǵan jaǵdaıda ákimshilik jaýapkershilik qarastyrylǵan.
Qoldanystaǵy zańnamaǵa sáıkes, quqyq buzýshylyqtar úshin jaýapkershilik QR Ákimshilik quqyq buzýshylyq týraly kodeksiniń birqatar baptarymen retteledi. Atap aıtqanda, 593-bap boıynsha jolaýshylardy tasymaldaý qaǵıdalaryn buzǵany úshin (mysaly, bir samokatpen eki adamnyń júrýi) jaýapkershilik kózdelgen. Sonymen qatar 620-bapta jol qozǵalysyna qatysýshylarǵa qoıylatyn ózge talaptardy buzý, al 615-bapta jol qozǵalysy qaǵıdalaryn saqtamaý jaǵdaılary qarastyrylǵan. Sondaı-aq, elektr samokattardy kámeletke tolmaǵandar paıdalanǵan jaǵdaıda, QR ÁQBtK-niń 127-babyna sáıkes jaýapkershilik olardyń zańdy ókilderine júkteledi.
Elektr samokat júrgizýshilerine qozǵalys tártibi naqty reglamenttelgen.
— Qoldanystaǵy erejelerge sáıkes, olar velosıped jolymen nemese arnaıy velosıped jolaǵymen júrýge quqyly. Al mundaı ınfraqurylym bolmaǵan jaǵdaıda, samokat júrgizýshilerine joldyń oń jaq shetimen, sonyń ishinde qoǵamdyq kólikke arnalǵan jolaqpen bir baǵytta qozǵalýyna ruqsat etiledi, — dep eskertti quqyq qorǵaý salasynyń mamandary.
Sonymen birge, qaýipsizdik talaptary kúsheıtilgen. Atap aıtqanda, 18 jasqa tolmaǵan, kólik quralyn basqarýǵa quqyq beretin júrgizýshi kýáligi nemese ýaqytsha kýáligi joq azamattarǵa joldyń júris bóligimen qozǵalýǵa tyıym salynady.
— 2026 jylǵy 1 shildeden bastap elektr samokattardy paıdalaný kezindegi quqyqtyq talaptar aıtarlyqtaı kúsheıtiledi. Atap aıtqanda, QR ÁQBtK-niń jańa 619-2-baby engizilip, elektr samokattardy basqarý quqyǵy joq tulǵalarǵa olardy paıdalanýǵa bergen operatorlarǵa jaýapkershilik qarastyrylady. Sonymen qatar, kıksherıng júıesine qatysty qosymsha retteý sharalary engiziledi. Endi elektr samokattarǵa tirkeý nómirleri berilip, olardy mindetti túrde esepke alý júıesi engiziledi. Operatorlar úshin azamattyq-quqyqtyq jaýapkershilikti mindetti saqtandyrý talaby belgilenedi, — delingen habarlamada.
Qaýipsizdik maqsatynda elektr samokattardy basqarýdyń eń tómengi jasy 18 jas bolyp bekitiledi. Al joldyń júris bóligimen qozǵalý úshin júrgizýshi kýáligi mindetti talapqa aınalady.
QR «Quqyqbuzýshylyqtardyń aldyn alý týraly» Zańynyń 2025 jylǵy redaktsııasyna sáıkes, elektr samokat operatorlaryna tirkeý nómirlerin berý jáne olardy kólik quraldaryna ornalastyrý arqyly esep júrgizý mindeti júkteledi.
Elektr samokattardy baqylaý jáne quqyq buzýshylyqtardyń aldyn alý maqsatynda tsıfrlyq sheshimder engizilýde.
Atap aıtqanda, «Sergek» kompanııasymen birlesip, tirkeý nómirlerin avtomatty túrde taný jáne quqyq buzýshylardy jaýapkershilikke tartý júıesin iske qosý boıynsha jumystar júrgizilýde. Tsıfrlyq tehnologııalardy qoldaný jáne sáıkestendirý júıesi quqyqbuzýshylardy tıimdi anyqtaýǵa, jol-kólik oqıǵalarynyń sanyn azaıtýǵa jáne paıdalanýshylardyń tártibin arttyrýǵa múmkindik beredi. Bul sharalar jol qozǵalysy qaýipsizdigin qamtamasyz etýge jáne sherıng operatorlarynyń jaýapkershiligin arttyrýǵa baǵyttalǵan.
Buǵan deıin samokat operatorlaryna jańa talaptar engizilgenin jazdyq.
