Astanada elektr samokattardy jalǵa beretin biryńǵaı platforma iske qosyldy
NUR-SULTAN. QazAqparat – Nur-Sultan qalasynda elektr samokattardy jalǵa berý platformasy iske qosyldy, dep habarlaıdy QazAqparat.
Elorda ákimdiginen málim etkendeı, samokattardy jalǵa alýdyń jumys prıntsıpi – kez kelgen qala turǵyny statsıonarlyq stantsııada samokatty alyp, qajetti mekenjaıǵa jetip, ony jaqyn ornalasqan stantsııada qaldyra alady.
Elektr samokatty paıdalaný úshin Jet mobıldik qosymshasyn júkteý qajet. Telefon nómiri boıynsha tirkelip, tólem jasaý úshin bank kartasyn qosymshamen baılanystyrý kerek. Transportty qoldanar kezde: samokatty tańdaý, QR-kodty skanerleý, qolaıly tarıfti tańdaý júzege asyrylady.
«Qazirgi ýaqytta qalanyń sol jáne oń jaǵalaýynda samokatty alýǵa nemese qaldyrýǵa bolatyn 60-tan astam oryn bar. Elektr samokattardyń ornalasqan jeri, zarıad dárejesi týraly derekter JET qosymshasynda bolady. Sondaı-aq, tańdalǵan samokatty tolyǵymen tegin brondaý múmkindigi de bar», - delingen ákimdik aqparatynda.
Samokatty jalǵa alý quny:
Dúısenbi – beısenbi aralyǵynda saǵat 00:00-den 11:59-ǵa deıin – 30 tg (1 mın)
Dúısenbi – beısenbi aralyǵynda saǵat 12:00-den 23:59-ǵa deıin – 35 tg (1 mın)
Juma - jeksenbi aralyǵynda saǵat 00:00-den 23:59-ǵa deıin – 35 tg (1 mın)
Qazirgi ýaqytta qalada 100 samokat iske qosyldy jáne aldaǵy ýaqytta olardyń sanyn 1 myńǵa arttyrý josparlanýda.
Aıta keteıik, elordada «Astana Bike» avtomattandyrylǵan velosıped jaldaý júıesi jumys isteıdi. Qala boıynsha 154 velostantsııa bar.
