Astanada elektr qýatynyń tarıfi 2,5 teńgege qymbattady

ASTANA. QazAqparat – Ulttyq ekonomıka mınıstrligi Tabıǵı monopolııalardy retteý komıtetiniń departament basshysy Qanat Qulnazarov elordada elektr tarıfi 1 shildeden bastap qalaı ózgergenin baıandady, dep habarlaıdy QazAqparat tilshisi.

«Astanany elektr qýatymen jabdyqtaý salasynda departament qyzmetin retteıtin 2 tabıǵı monopolııa sýbektisi bar. Biri – «Astana-REK» AQ, ekinshisi – «Astanaenergosbyt» JShS.

«Astana-REK» tarıfi elektr qýatyn satyp quny 32,7 mln teńgege artýymen, eńbekaqyǵa jumsalatyn shyǵyn 1,6 mlrd teńgege ulǵaıýyna, memleket menshiginen kásiporynǵa berilgen jelilerdi kútip ustaý shyǵyndary 98,7 mln teńgege artýymen baılanysty túzetildi. Tarıftiń ózgerý máni 64 tıynǵa teń. 1 Kvt/saǵ elektrdiń tarıfi 5,38 teńgeden 6,14 teńgege nemese 29,5% ósti», - dedi ol.

Aıtýynsha, «Astanaenergosbyt» JShS-niń elektrmen jabdyqtaý tarıfi energııa kózderi men energııa berýshi kásiporyndardyń tarıfiniń ósýine baılanysty túzetilgen.

«Sondaı-aq, eńbekaqy tóleý shyǵyndarynyń artýy da osyǵan yqpal etti. Tarıftiń orta eseppen ózgerýi 2,7 teńgege teń. 1 Kvt/saǵ elektr quny 20,4 teńgeden 23,1 teńgege ósti. Jalpy, kásiporyndar tarıfti 27,1 teńge etý týraly ótinim túsirgen bolatyn. Halyq úshin tarıftiń ózgerý máni 2,5 teńge bolyp otyr. 1 Kvt/saǵ elektrdiń quny 14,7 teńgeden 17,2 teńgege ulǵaıdy. Ótinim 19,2 teńge boldy», - dedi Qanat Qulnazarov.