Astanada elektr qýatyn únemdeýdiń keshendi jospary 89 paıyzǵa oryndaldy
NUR-SULTAN. QazAqparat – Bıyl elordada elektr energııasyn únemdeý jáne onyń tıimdiligin arttyrýǵa arnalǵan keshendi jospardyń 89,3% oryndaldy. Bul týraly Nur-Sultan qalasynyń otyn-energetıka kesheni jáne kommýnaldyq sharýashylyq basqarmasynyń basshysy Tólegen Qulyshev málim etti, dep habarlaıdy QazAqparat tilshisi.
«Qalalyq keshendi jospar aıasynda energııany únemdeý jáne onyń tıimdiligin arttyrýǵa arnalǵan 189 is-shara bar. Onyń ishinde energetıka jáne kommýnaldyq sharýashylyq salasynda energııany únemdeýge arnalǵan 63 shara, turǵyn úı sektory salasynda - 15 is-shara, kólik - 3, bıýdjet - 66 jáne ózge de sektorlar boıynsha 24 is-shara qarastyrylǵan. Sonymen qosa energııany únemdeýdi nasıhattaýǵa arnalǵan 7 jáne onyń tıimdiligin arttyrý kartasy sheńberinde 3 shara belgilendi. Odan bólek, dúnıejúzilik banktiń «Nur-Sultan qalasynyń energııa tıimdiligin arttyrýǵa» (ESMAP) arnalǵan jobasy sheńberinde tehnıkalyq kómek kórsetý boıynsha 5 shara josparlandy. Sol sııaqty memlekettik energetıkalyq reestr baǵytynda 3 shara bar»,- dedi Tólegen Qulyshev qalalyq máslıhattyń otyrysynda jasaǵan baıandamasynda.
Onyń aıtýynsha, búginde energetıka sektorynda josparlanǵan 63 is-sharanyń 55-i iske asty.
«Turǵyn úı sektorynda 15 sharanyń bireýi ǵana oryndalǵan joq. Basqa sektorlar boıynsha keshendi jospardyń kópshiligi iske asyryldy. Al keı sektorlarda jospar tolyqtaı júzege asty. Jalpy qalalyq elektr qýatyn únemdeýdiń keshendi jospary 89,3%-ǵa oryndaldy. Naqty aıtqanda, 12 myń tonnadan astam otyn, ıaǵnı 35 MVt/saǵ elektr qýatyn únemdedik», - deıdi ol.
