Astanada elektr qýatyn tutyný deńgeıi tómendedi
ASTANA. 1 qarasha. QazAqparat - Elordada bıylǵy jyldyń qorytyndysy boıynsha elektr energııasynyń shyǵyny 56 mln kVt/saǵ bolady nemese ótken jylmen salystyrǵanda 9% tómendeıdi dep boljanyp otyr. Osy jáne basqa da kórsetkishter Astana qalasy ákiminiń orynbasary Vasılıı Krylovtyń jetekshiligimen ótken keńeste jarııalandy. Keńestiń basty taqyryby - «Astana sý arnasy» MKK elektr qýatyn únemdeý baǵdarlamasy boıynsha ınvestıtsııalyq is-sharalardy oryndaý boldy. Bul týraly Astana qalasy ákimi apparatynyń ómirdi qamtý jáne ınfraqurylymdy damytý bólimine silteme jasap astana.kz habarlady.
Qazirgi ýaqytta uıymdastyrylǵan is-sharalardyń nátıjesinde elektr energııasyn tutyný deńgeıi birneshe esege tómendegen.
«Búgingi tańda avtomattandyrylǵan baqylaý jáne energııa resýrstaryn esepke alý júıesine arnalǵan qondyrǵyny montajdaý jumystary júrgizildi jáne sýmen qamtý, sý burý nysandarynda energııa únemdegish apparattar, dızel-generatorlar, kanalızatsııa men sý sorap stantsııalarynda elektr qondyrǵylar, sondaı-aq, Astana sý torabynda maı transformatorlar ornatyldy», - delingen habarlamada.
Budan basqa, sorapty súzgileý stantsııalarynyń ortalyq bazasynda jylý eseptegish qondyrǵylary aýystyryldy. Aıta keteıik, 2011 jyly «Astana sý arnasy» MKK nysandary 70 mln kVt/saǵ elektr qýatyn tutynsa, 2012 jyly bul kórsetkish 13 paıyzǵa tómendep, 61 mln kVt/saǵ qurady.
